ლევან ჩიკვაიძე: "საქართველოს ფოსტით" კერძო ინვესტორები ინტერესდებიან
დღეს ეს კომპანია საჭიროებს ინვესტიციებს და კერძო ინვესტიცია იქნება საუკეთესო,-„საქართველოს ფოსტა“ ნაწილობრივი პრივატიზებისთვის ემზადება.
სახელმწიფო კომპანიის გენერალური დირექტორი,ლევან ჩიკვაიძე ამბობს,რომ აქტივის მიმართ ინვესტორების დაინტერესება არსებობს.
„ბიზნესი მას უკეთესად მიხედავს.არ ვამბობ, რომ უნივერსალური საფოსტო მომსახურების პრივატიზება მოხდება.ეს მსოფლიოში მხოლოდ სამმაა ოპერატორმა შეძლო: მალტის, ლიბანისა და ნიდერლანდების. სხვა ქვეყნებში არსად, ყველაზე ძლიერი ოპერატორებიც არ არის სრულად პრივატიზებული. ამიტომ, ეტაპობრივი პრივატიზაცია მგონია, რომ იქნება შედეგი იმ პროცესის, რაც დღეს მიდის“,- განაცხადა ლევან ჩიკვაიძემ გადაცემა „ბიზნესპარტნიორში“ სტუმრობისას.
ლევან ჩიკვაიძე აღნიშნავს, რომ კომპანიის მიმართ კერძო ინვესტორების დაინტერესება არსებობს.
„მთავარი ის არის, რომ „საქართველოს ფოსტამ“ მიაღწია იმას, რომ ინვესტორი დაინტერესდა ამ კომპანიაში ინვესტირებით. რა თქმა უნდა, ვერ დავაინტერესეთ უნივერსალური საფოსტო ვალდებულების შესრულებით. სურვილები არსებობს, ქვეყნის გარედანაც და ქვეყნის შიგნიდანაც“, - განაცხადა ლევან ჩიკვაიძემ.
მისი თქმით, „საქართველოს ფოსტაში“ წლევანდელი წელი „რეორგანიზაცია-პრივატიზაციას“ დაეთმობა.
„ვართ იმ დონეზე, რომ ვფიქრობ, შევძლებთ, 2021 წელს პროცესის ბოლომდე მიყვანას.ვერ გპირდებით, რომ უნივერსალური საფოსტო მომსახურების განკერძოება მოხდება, ჯერ-ჯერობით ეს ცოტა წარმოუდგენელია. თუმცა, არის ბიზნესის შემადგენელი ნაწილები,რომელიც საჭიროებს ინვესტირებას და რომელიც დაეხმარება უნივერსალური საფოსტო მომსახურების უკეთესად შესრულებას. რა ფორმით განხორციელდება ეს?ბევრი მაგალითი არსებობს და შეგვიძლია სამოქმედოთ ავიღოთ საუკეთესო მაგალითი“, -აღნიშნა „საქართველოს ფოსტის“ გენერალურმა დირექტორმა.
