ლაშა ხუციშვილი: მშპ ერთ სულ მოსახლეზე 2023 წლისთვის $7900-ს გადააჭარბებს
2023 წლის ბიუჯეტის კანონპროექტის მიხედვით, ნომინალური მთლიანი შიდა პროდუქტი 79,7 მლრდ ლარს შეადგენს.
ფინანსთა მინისტრმა, ლაშა ხუციშვილმა პარლამენტში ბიუჯეტის წარდგენისას განაცხადა, რომ 2023 წლისთვის, ეკონომიკური ზრდისა და მშპ-ის დეფლატორის მაჩვენებლების პროგნოზები არ შეცვლილა და თითოეული მათგანი 5%-ს.
„მომდევნო წლებში, ეკონომიკური ზრდის მაჩვენებელი საშუალოდ 5%-ზეა შენარჩუნებული, მთლიანი შიდა პროდუქტის დეფლატორის პროგნოზი 3%-ია. შესაბამისად, მთლიანი შიდა პროდუქტის ნომინალური მაჩვენებელი, 2023 წელს პროგნოზირებული 79,7 მილიარდი ლარიდან 2026 წლისთვის იზრდება 101,2 მილიარდ ლარამდე. რაც შეეხება მთლიან შიდა პროდუქტს ერთ სულ მოსახლეზე - არსებული პროგნოზით, 2023 წლისთვის მისი მაჩვენებელი 7900 დოლარს, ხოლო 2026 წლისთვის - 10 000 დოლარს გადააჭარბებს“, - განაცხადა ფინანსთა მინისტრმა, ლაშა ხუციშვილმა.
როგორც მან აღნიშნა, მიმდინარე წელს ინფლაცია ერთ-ერთი მთავარი გამოწვევაა საქართველოში, ისევე, როგორც მთელ მსოფლიოში.
„2023 წელს, საბაზო ეფექტის ამოწურვასთან ერთად, მოსალოდნელია ინფლაციის ტემპის მნიშვნელოვანი შემცირება და მისი საშუალო მაჩვენებელი პროგნოზირებულია 5,3 პროცენტის დონეზე, თუმცა წლის ბოლოსთვის 4-პროცენტიან ნიშნულს ჩამოცდება“, - განაცხადა ფინანსთა მინისტრმა, ლაშა ხუციშვილმა.
