ხელფასები საშუალოდ 5 ლარით შემცირდა - ყველაზე მაღალი ანაზღაურება IT სექტორში აქვთ

ხელფასები პანდემიის პერიოდში შემცირდა, თუმცა კლება საშუალო თვიურ ნომინალურ ხელფასში უმნიშვნელოა 5 ლარი ანუ 0.4%. შედეგად, საშუალო ხელფასი საქართველოში 1314.7 ლარია.

ყველაზე მაღალი საშუალო ანაზღაურებით ინფორმაციისა და კომუნიკაციების სექტორი ლიდერობს, სადაც წლიურად ხელფასები 6.2%-ით გაიზარდა და 2199.8 ლარი შეადგინა, მშენებლობაში ზრდა 1.2%-ი იყო, აქ საშუალო თვიური ანაზღაურება 2061.8 ლარია, 8.8%-იანი კლებაა პროფესიულ და სამეცნიერო სექტორში, ანაზღაურება კი, საშუალოდ აქ 2020.9 ლარს შეადგენს, საფინანსო და სადაზღვევო სექტორებში კი, 4.2%-იანი ზრდის შემდეგ თვიური ანაზღაურება 2017.2 ლარს აღწევს.

2020 წლის IV კვარტალში დაქირავებით დასაქმებულთა საშუალო ხელფასი ბიზნეს სექტორში 12.2 ლარით გაიზარდა და 1417 ლარი შეადგინა. არასამეწარმეო და საფინანსო სექტორში საშუალო თვიური ხელფასი წლიურად 9.2 ლარით შემცირდა და 1 157.2 ლარი შეადგინა.