ირაკლი ნადარეიშვილი: ქვეყანა აქტიური ეკონომიკური აღდგენის ფაზაში შედის

ეკონომიკის მინისტრის მოადგილე ირაკლი ნადარეიშვილი აცხადებს, რომ საქართველო აქტიური ეკონომიკური აღდგენის ფაზაშია. მისი თქმით, ამაზე მეტყველებს ბოლო პერიოდში ეკონომიკური ზრდის რეკორდული მაჩვენებლები.

როგორც ნადარეიშვილმა კომპანია „თიბისი კაპიტალის" მიერ ორგანიზებულ დისკუსიაზე ისაუბრა ეკონომიკის სტიმულირების სამთავრობო პროგრამებზე, რომლებიც კერძო სექტორს პანდემიური შოკიდან გამოსვლაში დაეხმარა და ასევე მიმართულია პოსტკრიზისული გამოწვევების დასაძლევად.

„ჯერ კიდევ 2020 წლის მეორე ნახევრიდან, როდესაც რეალურად შესაძლებელი გახდა ბიზნეს აქტივობა და ეკონომიკური საქმიანობა, ჩვენ მაქსიმალურად გავაფართოეთ კერძო სექტორის მხარდაჭერის მიმართულებები. მათ შორის, ავამუშავეთ საკრედიტო - საგარანტიო სქემა და დღეის მდგომარეობით მხოლოდ ამ პროგრამით 250 მლნ ლარის ოდენობის სესხის გარანტია განვახორციელეთ. ჩვენს პროგრამებში მოხვდა 60-მდე ახალი სასტუმროს პროექტი, რომლებიც დააფინანსეს არა მხოლოდ ინვესტორებმა, არამედ მათ ჰქონდათ საბანკო დაფინანსებაც და ეს მაშინ, როდესაც ტურიზმის აღდგენაზე საუბარიც კი არ იყო," - განაცხადა ირაკლი ნადარეიშვილმა.

მინისტრის მოადგილის განცხადებით, მცირე და საშუალო მეწარმეობის მხარდაჭერა ქვეყნის ეკონომიკური პოლიტიკის ერთ-ერთი პრიორიტეტია.

„საქართველოს პრემიერ-მინისტრმა პარლამენტში გამოსვლისას დააანონსა ბიზნესის სტიმულირების ახალი პროგრამები, რომლებიც დაახლოებით 1 თვეში ამოქმედდება. ჩვენ მთელი 2020 წლის განმავლობაში ბიზნესთან ძალიან აქტიურად ვიმუშავეთ ყველა იმ პროგრამის დიზაინზე, რომელიც განხორციელდა კრიზისის დაძლევის ნაწილში. დღეს გვინდა, მოვუწოდოთ ბიზნესს, რათა აქტიურად ჩაერთოს აღდგენის ნაწილში, რათა ყველა ის ღონისძიება, რომელთაც ეკონომიკის სამინისტრო განახორციელებს, იყოს მიზნობრივი და მაქსიმალურად ეფექტური," - განაცხადა ირაკლი ნადარეიშვილმა.

შეგახსენებთ, რომ „თიბისი კაპიტალის" პროგნოზის მიხედვით, საქართველოს მშპ-ის ზრდა მოსალოდნელზე ძლიერია - რეალური ზრდა 2021 წელს დაახლოებით 10.5% იქნება, 2022 წელს კი - 6.5%. კვლევის თანახმად, 2019 წელს ტურიზმიდან მიღებული შემოსავლების 40% 2021 წელს აღდგება, 2022 წლის მაჩვენებელი კი 2019 წლის 90%-ს მიაღწევს.

კვლევის პრეზენტაციასა და დისკუსიაში მონაწილეობდნენ საქართველოს ეროვნული ბანკის ვიცე-პრეზიდენტი პაპუნა ლეჟავა და „თიბისი ბანკის" გენერალური დირექტორი ვახტანგ ბუცხრიკიძე.