გურამ გურამიშვილი: საქართველოს საზღვაო ნავსადგურებში სერვისების გაციფროვნება მნიშვნელოვანია
საქართველოს ნავსადგურებში სანავსადგურე და სატრანსპორტო სერვისების გაციფროვნების პროცესი ეტაპობრივად მიმდინარეობს.
ეკონომიკის მინისტრის მოადგილემ გურამ გურამიშვილმა საზღვაო სერვისების გაციფროვნებასთან დაკავშირებით გამართულ პირველ სამუშაო ონლაინ შეხვედრაზე განაცხადა, რომ უმნიშვნელოვანესია საქართველოს ყველა საზღვაო ნავსადგურში განხორციელდეს სერვისების გაციფროვნება და ერთი ონლაინ პლატფორმის ქვეშ გაერთიანება.
„პროცესი ხელს შეუწყობს ტვირთების გამტარუნარიანობის გაზრდას ნავსადგურებში, რაც საქართველოს ნავსადგურებს მისცემს შესაძლებლობას, წინასწარ დაგეგმონ ტვირთნაკადები სახაზო/რეგულარული მიმოსვლის გემებისათვის და ასევე, ტვირთების კატეგორიებისა და მოცულობის მიხედვით," - აღნიშნა გურამ გურამიშვილმა.
მისივე თქმით, საქართველოს ტრანზიტული პოტენციალის ზრდისთვის მნიშვნელოვანია პორტებში სახელმწიფო სერვისების გაციფროვნება და ერთ ონლაინ-პლატფორმაზე - „ერთი ფანჯრის პრინციპით" (MSW) გაერთიანება.
"საქართველოში აშშ-ს საელჩოს და EXBS პროგრამის დაფინანსებით საქართველოს საზღვაო ტრანსპორტის სააგენტომ უკვე განახორციელა „ერთი ფანჯრის პრინციპის" პროექტის ტექნიკურ-ეკონომიკური დასაბუთების კვლევა. პროექტი დანერგვის ეტაპზე 2021 წლის სექტემბერში გადავა," - განაცხადა მინისტრის მოადგილემ.
მისი თქმით, ეს გააუმჯობესებს საქართველოს პორტების ეფექტიანობას, მკვეთრად შეამცირებს შეფერხებებს პორტებში, გაამარტივებს დოკუმენტაციასთან მუშაობის პროცესს და არსებითად გაზრდის ტვირთბრუნვას.
„პროექტი ასევე დაეხმარება საქართველოს, შეამციროს საზღვაო ტრანსპორტის ნეგატიური ზემოქმედება გარემოზე და ხელს შეუწყობს საქართველოს მწვანე ეკონომიკაზე გადასვლის პროცესს. ყოველივე გაზრდის საქართველოს მისწრაფებას გახდეს რეგიონული ლოგისტიკური და სატრანსპორტო ჰაბი," - განაცხადა გურამ გურამიშვილმა.
შეგახსენებთ, რომ ევროპის რეკონსტრუქციისა და განვითარების ბანკის (EBRD) ფინანსური მხარდაჭერითა და საქართველოს პრემიერ-მინისტრთან არსებული დამოუკიდებელი საკონსულტაციო ორგანოს, ინვესტორთა საბჭოს დახმარები, ეკონომიკისა და მდგრადი განვითარების სამინისტროს საზღვაო ტრანსპორტის სააგენტო საქართველოს პორტებში ნავსადგურების გაერთიანებული სისტემის (PCS - Port Community Systems) დანერგვის მიზანშეწონილობის კვლევას განახორციელებს. კვლევა შეისწავლის ასოცირებულ რეგიონულ სისტემებთან აღნიშნული ელექტრონული პლატფორმის ინტეგრირების შესაძლებლობებსაც, მაგალითად, შავი ზღვისა და ევროპის სამეზობლო პოლიტიკის ქვეყნებთან და ევროკავშირის სისტემებთან.
ონლაინ შეხვედრაზე აღინიშნა, რომ PCS - ი არის ელექტრონული პლატფორმა, რომელიც აკავშირებს ნავსადგურის მართვის სხვადასხვა სისტემას პროფილურ სახელმწიფო და კერძო სტრუქტურებს შორის ინფორმაციის უსაფრთხო და სწრაფი გაცვლის მიზნით. პროექტის განხორციელება გააუმჯობესებს ნავსადგურებისა და ლოგისტიკური პროცესების მართვას და ავტომატიზაციას, აგრეთვე ხელს შეუწყობს უწყებათაშორისი კოორდინაციას და მნიშვნელოვნად შეამცირებს ადმინისტრაციულ მოთხოვნებსა და ბიუროკრატიას.
