გენადი არველაძე: ვფიქრობ, შეგვიძლია, დავუბრუნდეთ განვითარების ჩვეულ დღის წესრიგს
პანდემიის შედეგად გამოწვეული ეკონომიკური ვარდნის შემდეგ მნიშვნელოვნად იზრდება ქვეყნის მაკროეკონომიკური მაჩვენებლები, - განაცხადა ეკონომიკის მინისტრის მოადგილემ გენადი არველაძემ დონორი ორგანიზაციების ეკონომიკური ზრდის თემატური სამუშაო ჯგუფის ონლაინ შეხვედრზე.
„მთავრობის ანტიკრიზისული გადაწყვეტილებების შედეგად საქართველოს ეკონომიკა იანვარ-ივლისში 12,7%-ით გაიზარდა. მნიშვნელოვანია, რომ წამყვანმა საფინანსო ორგანიზაციებმა გადახედეს წლის დასაწყისში გამოქვეყნებულ ეკონომიკური ზრდის საპროგნოზო მაჩვენებლებს მატების მიმართულებით. მაგალითად, საერთაშორისო სავალუტო ფონდმა მშპ-ს საპროგნოზო მაჩვენებელი 7,7%-მდე გაზარდა და საქართველო დაასახელა ქვეყნად, სადაც საშუალოვადიან პერიოდში ევროპის რეგიონის მასშტაბით ეკონომიკის ყველაზე სწრაფი აღდგენა იქნება შესაძლებელი. ამის გათვალისწინებით, ვფიქრობ, რომ უკვე შეგვიძლია, დავუბრუნდეთ განვითარების ჩვეულ დღის წესრიგს," - განაცხადა გენადი არველაძემ.
მინისტრის მოადგილის თქმით, საქართველოს მთავრობამ შეიმუშავა 10-წლიანი განვითარების გეგმა, რომელმაც საკმაოდ ამბიციური სამიზნე მაჩვენებლები აქვს.
ეკონომიკის მინისტრის თანათავმჯდომარეობით გამართულ შეხვედრაში მონაწილეობა მიიღეს 20-ზე მეტი დონორი ორგანიზაციისა და საქართველოს სამთავრობო უწყებების წარმომადგენლებმა. დონორთა სხდომას თავმჯდომარეობდა ევროპის საინვესტიციო ბანკის რეგიონული დირექტორი სამხრეთ კავკასიაში მაჩიე ჩურა.
ონლაინ - შეხვედრაზე საქართველოს სამთავრობო უწყებების წარმომადგენლთა მხრიდან გაკეთდა პრეზენტაციები მომდევნო წლებში დაგეგმილი რეფორმებისა და შესაბამისი პროექტების შესახებ, რომლებიც დონორთა მხარდაჭერით უნდა განხორციელდეს. მათ შორის, ვაჭრობის, ტრანსპორტის, ინფრასტრუქტურის, „მწვანე ეკონომიკის" მიმართულებებით.
