Galt & Taggart-ი: 4%-იანი ზრდა აჩვენებს რამდენად მნიშვნელოვანია ეკონომიკის გახსნა
„მარტში ეკონომიკური ზრდის შედეგი იმაზე კარგი დაფიქსირდა, ვიდრე ჩვენ ვპროგნოზირებდით,“ - ამის შესახებ „ბიზნესპარტნიორს“ Galt&Taggart-ის კვლევების დეპარტამენტის უფროსმა განუცხადა.
ევა ბოჭორიშვილის განმარტებით, პოზიტიური ტრედი ეკონომიკის ეტაპობრივი გახსნის შედეგია.
„ჩვენ რასაც ვპროგნოზირებდით მარტის თვიდან, იმაზე კარგი შედეგი გამოქვეყნდა. ველოდით, რომ ეკონომიკური ზრდის პოზიტიური მაჩვენებელი დაფიქსირდებოდა, თუმცა 4%-იანი ნიშნული აღემატება ჩვენს წინასწარ გაანგარიშებას. ეს აჩვენებს რამდენად მნიშვნელოვანია ეკონომიკის გახსნა. ძირითადი გავლენა ეკონომიკური ზრდის ამ მაჩვენებელზე აქვს იმ გარემოებას, რომ თებერვლიდან მოყოლებული ეტაპობრივად გაიხსნა ეკონომიკა და რა თქმა უნდა, წინა წლის დაბალი ბაზაც მოქმედებს იმაზე, რომ მარტში წინა წლის ანალოგიურ პერიოდთან შედარებით გაუმჯობესებული მაჩვენებელი გვაქვს,“ - განაცხადა ევა ბოჭორიშვილმა.
მისივე განმარტებით, Galt&Taggart ელის, რომ მომდევნო თვეებში ეკონომიკური ზრდის გაუმჯობესება იქნება უფრო მნიშვნელოვანი, თუმცა ქვეყნის ეკონომიკაში კვლავ ბევრი გაურკვევლობა ნარჩუნდება.
„რა თქმა უნდა, ტურიზმის აღდგენის თვალსაზრისით მოლოდინები კვლავ პესიმისტურია. ჯერ კიდევ არ ვიცით სახმელეთო საზღვრები როდის გაიხსნება. თუ ეკონომიკის დამატებითი შეზღუდვები არ დაწესდება, ვფიქრობთ რომ გაუმჯობესების ტემპი მომდევნო თვეებში უკეთესი გახდება. ამ ეტაპზე გაურკვევლობა ბევრი მიმართულებით ნარჩუნდება. თუმცა, დღეს რა ინფორმაციაც გვაქვს, ვფიქრობთ, რომ შესაძლებელია, წლიურად 4%-იანი ეკონომიკური ზრდის მიღწევა.“-განაცხადა ევა ბოჭორიშვილმა.
შეგახსენებთ, რომ იანვარ-თებერვლის მნიშნელოვანი ვარდნის შემდეგ, საქართველოს ეკონომიკა მარტში 4%-ით გაიზარდა. ამის მიუხედავად კვლავ მინუსებში რჩება I კვარტლის ზრდა. საქსტატის მონაცემებით, საშუალო რეალურმა კლებამ 4.2% შეადგინა.
