EBRD-ს საქართველოში €4 მლრდ აქვს ინვესტირებული
ევროპის რეკონსტრუქციისა და განვითარების ბანკის (EBRD) ინვესტიციების მოცულობა საქართველოში 4 მლრდ ევროს აღწევს. მთლიანობაში ინვესტიცია განხორციელებულია 250-ზე მეტი პროექტი.
საფინანსო ინსტიტუტის განხორციელებული პროექტები მიმოიხილეს პრემიერ-მინისტრ ირაკლი ღარიბაშვილსა და EBRD-ის ვიცე-პრეზიდენტ ალან პილოუს ვიდეოკონფერენციის ფორმატში გამართულ შეხვედრაზე.
შეხვედრაზე აღინიშნა, რომ EBRD-ის პორტფელის უდიდესი წილი კერძო სექტორზე მოდის, რასაც ძლიერი და მდგრადი გავლენა აქვს საქართველოს ეკონომიკაზე.
ირაკლი ღარიბაშვილმა აღნიშნა, რომ საქართველოს მთავრობა მზად არის, ევროპის რეკონსტრუქციისა და განვითარების ბანკთან კიდევ უფრო გააძლიეროს თანამშრომლობა.
შეხვედრაზე ისაუბრეს COVID-19-ით შექმნილ გამოწვევებზე, განსაკუთრებით აღინიშნა EBRD-ის მნიშვნელოვანი როლი, როგორც პანდემიის, ასევე პოსტპანდემიურ ეტაპზე მცირე და საშუალო ბიზნესის მხარდაჭერის მიმართულებით.
ასევე განიხილეს საქართველოს პრემიერ-მინისტრის მიერ ინიცირებული ქვეყნის განვითარების ათწლიანი გეგმის ძირითადი ასპექტები. საუბრისას, დადებითად შეფასდა ევროპის რეკონსტრუქციისა და განვითარების ბანკის მხარდაჭერით დაფუძნებული ინვესტორთა საბჭო, რომელიც ბიზნესს, საერთაშორისო ორგანიზაციებს, დონორებს და საქართველოს მთავრობას შორის კონსტრუქციული დიალოგის დამოუკიდებელი პლატფორმაა.
