"ავტორიზებული ოპერატორის სტატუსის მიღებისას, კომპანიები საბაჟო ფორმალობებზე პრიორიტეტის წესით ისარგებლებენ"
გზამკვლევი ეკონომიკურ რეფორმებში
"ავტორიზებული ოპერატორის სტატუსის მიღებისას, კომპანიები საბაჟო ფორმალობებზე პრიორიტეტის წესით ისარგებლებენ," - ამის შესახებ გადაცემა „ბიზნესპარტნიორი პიკის საათში“ შემოსავლების სამსახურის საბაჟო დეპარტამენტის უფროსის მოადგილე, ელგუჯა ბერანძემ განაცხადა.
მისი ინფორმაციით, პროგრამის მიზანია საბაჟო ადმინისტრაციასა და კერძო მეწარმეებს შორის ახალი ურთიერთობების პროგრამულად შექმნა, სადაც ადმინისტრაცია და ავტორიზებული ეკონომიკური ოპერატორები როგორც პარტნიორები იქნებიან წარმოდგენილი და მათი ურთიერთთანამშრომლობა გამარტივებული პროცედურებით იქნება გამოხატული.
“ავტორიზებული ოპერატორის სტატუსი შეიძლება მიიღოს ნებისმიერმა, თუ მისი საქმიანობა საბაჟოსთანაა დაკავშირებული.კომპანიებს ექნებათ ისეთი შეღავათები, როგორიცაა ნაკლები სიხშირე და კონტროლი როგორც დოკუმენტური, ასევე ფიზიკური,"- აცხადებს ბერანძე.
როგორც შემოსავლების სამსახურის საბაჟო დეპარტამენტის უფროსის მოადგილე აღნიშნავს, ამ დროისათვის ავტორიზებული ეკონომიკური ოპრატორის სტატუსით სულ 7 კომპანია სარგებლობს და პარალელურ რეჟიმში, რამდენიმე განცხადების განხილვა მიმდინარეობს.
მისი ცნობით, ამ ეტაპზე სტატუსის მიღებაზე მეტწილად მსხვილი კომპანიები არიან დაინტერესებული, ხოლო ის მცირე კომპანიები, რომლებსაც საბაჟოსთან არანაირი შეხება არ აქვთ, მათი მხრიდან ინტერესი დაბალია.
შეგახსენებთ, USAID-ის ეკონომიკური მმართველობის პროგრამის ფარგლებში, გამარტივებული პროგრამა“ საბაჟო პროცედურები ბიზნესისთვის“, საქართველოსა და ევროკავშირს შორის გაფორმებული ასოცირების შესახებ შეთანხმების საფუძველზე ამოქმედდა.
ავტორიზებული ეკონომიკური ოპერატორის სტატუსის მიღება ბიზნესებს საშუალებას მისცემს გამარტივებული პროცედურებით სხვა ქვეყნებშიც ისარგებლონ.
