"ავტორიზებული ეკონომიკური ოპერატორის სტატუსი ბიზნესებს გამარტივებული პროცედურებით სარგებლობის შესაძლებლობას მისცემს"

გზამკვლევი ეკონომიკურ რეფორმებში

USAID-ის ეკონომიკური მმართველობის პროგრამის ფარგლებში, გამარტივებული პროგრამა“ საბაჟო პროცედურები ბიზნესისთვის“, საქართველოსა და ევროკავშირს შორის გაფორმებული ასოცირების შესახებ შეთანხმების საფუძველზე ამოქმედდა.

ავტორიზებული ეკონომიკური ოპერატორის სტატუსის მიღება ბიზნესებს საშუალებას მისცემს გამარტივებული პროცედურებით სხვა ქვეყნებშიც ისარგებლონ. ამის შესახებ გადაცემა „ბიზნესპარტნიორს“ USAID-ის ეკონომიკური მმართველობის პროგრამის ხელმძღვანელმა, ნატალია ბერუაშვილმა განუცხადა.

მისი ინფორმაციით, IUGBC-ის გრანტის ფარგლებში ჩატარებულმა კვლევამ,  რომელიც კომპანიებში ბიზნეს პროცესებს აჩვენებს და იმას, თუ რამდენად სწორად აკვალიფიცირებს რისკებს, ცხადყო, რომ  ერთ-ერთი უმნიშვნელოვანესი დამაბრკოლებელი ფაქტორი არაინფორმირებულობაა.

აღნიშნული კვლევის ფარგლებში, ინფორმაცია 70 კომპანიას დაეგზავნა და გამოიკვეთა, რომ საჭიროა ამ პროგრამის შესახებ მეტი ინფორმაციის გავრცელება.

„ჩვენი პროგრამის აქცენტია საჯარო და კერძო სექტორებს შორის დიალოგისა და თანამშრომლობის მიმართულება. ეს პროგრამა არის თანამშრომლობაზე აგებული,"-აცხადებს ბერუაშვილი.  

როგორც USAID-ის ეკონომიკური მმართველობის პროგრამის ხელმძღვანელი აღნიშნავს, ბიზნეს ასოციაციასთან და შემოსავლების სამსახურთან თანამშრომლობა პროდუქტის მაქსიმალურად გამოყენების საშუალებას ხელს შეუწყობს.