27 ლოტი და ₾72,835 მლნ - "100 საინვესტიციო შეთავაზება ბიზნესს" აუქციონების შედეგები

27 ლოტი და 72 835 800 ლარი - ასეთია სახელმწიფო ქონების ეროვნული სააგენტოს მიერ აუქციონზე გამოტანილი პრივატიზაციის მორიგი ეტაპის შედეგები.

სააგენტოს ცნობით, სახელმწიფო პროგრამა „100 საინვესტიციო შეთავაზება ბიზნესს“ ფარგლებში, 17-18 მაისს დასრულებულ ელექტრონულ აუქციონებზე ვაჭრობა 27 ლოტზე შედგა, აუქციონის შედეგად გაყიდული ქონების ღირებულება საწყის ფასთან შედარებით 86%-ით გაიზარდა. საწყისი ფასი კი 39 207 800 ლარით იყო განსაზღვრული.

როგორც სააგენტოში ამბობენ, ყველა მონაწილეს თანაბარი შესაძლებლობა ჰქონდა საკუთარი შეთავაზების დაუბრკოლებლად დასაფიქსირებლად, ვაჭრობის პროცესი გამარჯვებულებმა წარმატებით დაასრულეს და გახდნენ სახელმწიფო აქტივის მესაკუთრე.

შეგახსენებთ, რომ 2021 წლის 1 იანვრიდან დღემდე პრივატიზებულია 160,157,033 ლარის უძრავი ქონება. მობილიზებული თანხა სააგენტოს წლიური გეგმის 70%-ს შეადგენს.

სააგენტო პრივატიზების პროცესის გაგრძელებას მომავალშიც გეგმავს და დაინტერესებულ პირებს შესთავაზებს სხვადასხვა ტიპის ქონებას, მათ შორის სახელმწიფოს საკუთრებაში არსებული ტურისტულ, სამრეწველო, სოფლის მეურნეობისა და ლოგისტიკური მიზნებისთვის საჭირო ობიექტებს.