“ვოთერ-თრაილ ინდასტრისი” “ბილაინში” წილს 71%-მდე ზრდის

კომუნიკაციების ბაზარზე გადანაწილება გრძელდება. ბიზნესპარტნიორის  ინფორმაციით, ბრენდ “ბილაინის” მფლობელი “ვიონი საქართველოს” 51%-ის მფლობელი დამატებით 20%-ის შეძენას გეგმავს და თუ მარეგულირებლის  თანხმობას მიიღებს, “ვოთერ-თრაილ ინდასტრისი” კომპანიის 71%-ის მფლობელი გახდება.

ამჟამად, კომპანიაში 29%-ს “ინვესტიკო ალიანსი” ფლობს, 20%-ს კი “მირენ ინვესტი”,  რომელიც „კავკასუს ონლაინის“ მაჟორიტარ აქციონერ ხვიჩა მაქაცარიასთან დაკავშირებული კომპანიაა.

თავად ხვიჩა მაქაცარია, ასევე ფლობს საქართველოსა და რეგიონში ინტერნეტის საბითუმო ბაზრის უმსხვილესი კომპანიის „კავკასუს ონლაინის“ 51%-ს.

აღსანიშნავია, რომ გასული წლის აგვისტოში “კავკასუს ონლაინის” წილი კომუნიკაციების კომისიის თანხმობის გარეშე გასხვისდა და ახლა კომპანიის 49%-ი აზერბაიჯანელი ბიზნესმენის  ნასიბ ჰასანოვის საკუთრებაში გადავიდა.

კომისია თვეებია წილების თავდაპირველ მდგომარეობში დაბრუნებას ითხოვს და ბოლო ვადა 1 მაისს ამოიწურა. რაც შეეხება ვიონს, ჩვენ უკვე ვთხოვეთ კომპანიას  კომენტარი  მოსალოდნელ გარიგებასა და  საქართველოში ბიზნესის განვითარების გეგმებზე.   შემდგომ  გამოშვებაში თემას ისევ დავუბრუნდებით.