თურქული ნედლეულით საქართველოში დამზადებული პროდუქცია EU-ში ექსპორტისას გადასახადებისგან გათავისუფლდება
საქართველოში დამზადებული პროდუქცია, რომლის წარმოებისთვისაც თურქული ნედლეული გამოიყენება, ევროკავშირში ექსპორტისას გადასახადებისგან გათავისუფლდება, - თურქეთში საქართველოს საელჩოს ინფორმაციით, დოკუმენტის რატიფიკაცია თურქეთის პარლამენტმა 10 თებერვალს მოახდინა.
შესაბამისად, თავისუფალი სავაჭრო რეჟიმი ამიერიდან გავრცელდება არამხოლოდ იმ პროდუქციაზე, რომელიც სრულად ქართული ან ევროპული ნედლეულით არის წარმოებული, არამედ იმ პროდუქტზეც, რომლის დასამზადებლადაც თურქული ნედლეულია გამოყენებული.
"2021 წლის 10 თებერვალს, თურქეთის რესპუბლიკის პარლამენტმა მოახდინა “თურქეთის რესპუბლიკასა და საქართველოს შორის თავისუფალი ვაჭრობის შესახებ შეთანხმების II ოქმში „საქონლის წარმოშობის“ ცნების განსაზღვრისა და ადმინისტრაციული თანამშრომლობის მეთოდების შესახებ ცვლილებების შეტანის შესახებ" თურქეთის რესპუბლიკასა და საქართველოს შორის თავისუფალი ვაჭრობის შეთანხმებით შექმნილი ერთობლივი კომიტეტის N1/2016 გადაწყვეტილების რატიფიცირება, რაც დამატებით შესაძლებლობას გაუხსნის თურქეთისა და საქართველოს ბიზნესებს, რათა გაზარდონ ერთობლივი ექსპორტი ევროკავშირის ბაზარზე.
ზემოაღნიშნული დოკუმენტით, ასევე, გათვალისწინებულია საქართველოში თურქულ ნედლეულზე დამზადებული პროდუქციის გატანა ევროკავშირის ბაზარზე, თავისუფალი სავაჭრო რეჟიმით",- ნათქვამია საელჩოს განცხადებაში.
