ტოტალური დაკეტვები არ უნდა იყოს - სილამაზის სალონი “პოდიუმი“
კორონავირუსის პანდემიის მეორე ტალღის ფარგლებში მთავრობამ თბილისსა და იმერეთში რესტორნების და გასართობი ობიექტების ფუქნციონირება შეზღუდა, უკვე ერთი კვირაა ამ ტიპის ობიექტები მხოლოდ 22:00 საათამდე მუშაობენ. ერთ-ერთი სექტორი, რომელიც აღნიშნულ რეგულაციაზე არაპირდაპირაა მიბმული სილამაზის სალონებია.
როგორც „პოდიუმის“ დამფუძნებელი ნელი ავილოვი აცხადებს, ბოლო ორი კვირაა სიტუაცია დამძიმდა - შემცირებულია აქტივობა, მიღებული შემოსავალი კი არ იძლევა საშუალებას, რომ საბანკო ვალდებულებების მომსახურება იყოს შესაძლებელი.
„სიტუაცია გაუარესებულია, შემოსავალი ისედაც დაბალი იყო და ახლა უფრო ქვევით მიდის ყველაფერი. მას შემდეგ რაც რესტორნებს დაუწესეს შეზღუდვები, ჩვენთან ხალხის ნაკადმა იკლო. ადამიანები თუ არ მიდიან არსად, გასასვლელი არ აქვთ, ნაკლებად სჭირდებათ სალონის მომსახურეობაც. რა თქმა უნდა, ეს ჩვენზეც მოქმედებს,“ - აცხადებს ავილოვი.
მისი ინფორმაციით, საკმაოდ რთული სიტუაცია იქნება თუ მთავრობა ბიზნესს კიდევ ერთხელ დახურავს. „ტოტალური დაკეტვები არ უნდა იყოს. ასეთ დროს უკვე რისკის წინაშე დადგება საერთოდ კიდევ შევძლებთ თუ არა მუშაობის განახლებას. ამიტომ, ყველა უნდა იყოს უფრო მობილიზებული, დაიცვას ყველა წესი, თუ ყველა მოიქცევა ისე, როგორც საჭიროა, ჩემი აზრით ქვეყანაში ბევრად უფრო კარგი ეპიდემიოლოგიური და ეკონომიკური სიტუაცია იქნება,“ - აცხადებს ავილოვა.
„პოდიუმის“ ხელმძღვანელი განმარტავს, რომ არსებული მდგომარეობის მიუხედავად მაქსიმალურად ცდილობს არ შეამციროს თანამშრომელთა რაოდენობა.
