ტკბილი ქვეყანა: რთული წლის მიუხედავად, რეალიზაცია 25%-ით გაგვეზარდა

საკონდიტრო პროდუქციის მწარმოებელი კომპანია „ტკბილი ქვეყანა“  2022 წელს „ბიზნესპარტნიორთან“ აჯამებს და აცხადებს, რომ კომპანიისთვის მიმდინარე წელი რთული იყო.

კომპანიის კომერციული დირექტორი კახა ყრუაშვილი განმარტავს, რომ სირთულე არსებული გარემოებებიდან გამომდინარეობდა, მათ შორის იყო ინფლაცია, კომუნალურებზე ფასის ზრდა, ნედლეულის გაძვირება, თუმცა,“ტკბილი ქვეყანა“  მიმდინარე წელს  გასულ წელთან შედარებით რეალიზაციის მაჩვენებლის  25%-იანი ზრდით ასრულებს.

„იმდენად მოვინდომეთ, რომ გეგმებს გადავაჭარბეთ. მოგება პირდაპირპროპორციულად არ გაიზრდებოდა, რადგან თვითღირებულების ზრდიდან გამომდინარე კომპანიას მოგების მარჟა შეუმცირდა. როგორც იცით, ნედლეული გაძვირდა, თუმცა, პროდუქციაზე ფასები პირდაპირპროპორციულად არ გაგვიზრდია.  მიუხედავად ამისა, 2022 წელს  კომპანია გასულ წელთან შედარებით, გაზრდილი მოგებით  დაასრულებს,“-აცხადებს ყრუაშვილი.

კითხვაზე,გაზრდილი ინფლაციის და მძიმე სოციალური ფონის გათვალისწინებით, რა გახდა კომპანიის რეალიზაციის მაჩვენებელის ზრდის მიზეზი, ყრუაშვილი განმარტავს, რომ ერთ-ერთი მთავარი  მიზეზი „ტკბილი ქვეყნის“ მარკეტინგული კამპანიაა.

ყრუაშვილი წლის ყველაზე მნიშვნელოვან  გამოწვევად ინფლაციურ პროცესებს ასახელებს.

„კონსიგნაცია გვაქვს ლარში, შესაბამისად, ის ლარი რაც კონსიგნაციაში იყო გაუფასურდა. ეს იყო პირდაპირ თანხის დაკარგვა,“-აცხადებს ყრუაშვილი.

შეგახსენებთ, საკონდიტრო კომპანია "ტკბილი ქვეყანა" 100-ზე მეტ სხვადასხვა სახეობის პროდუქციას აწარმოებს.