"ტენე" ელექტრო ველოსიპედების მასიურ წარმოებას გეგმავს
„ტენე“ დაინტერესების შემთხვევაში ელექტრო ველოსიპედების მასიურ წარმოებას განიხილავს. საუბარია, პროდუქტზე, რომელსაც სიმბოლური დანიშნულება აქვს და რომელიც, სატერფულების დატრიალებით ბიჯური ძრავის მეშვეობით ელექტრო ენერგიას გამოიმუშავებს.
როგორც კომპანიის დამფუძნებელი სანდრო ლილუაშვილი „ბიზნესპარტნიორთან“ აცხადებს, 1 ცალის სავარაუდო ღირებულება 1500 ლარი იქნება.
მისივე განცხადებით, ველოსიპედის მეშვეობით 1 საათში 100 ვატის მიღებაა შესაძლებელი.
კომპანიამ ელექტრო ველოსიპედის წარმოება ახლახანს დაიწყო. „საქართველოში მოხმარებული ელექტროენერგია ძირითადად რუსეთიდანაა იმპორტირებული, ამაში ვიხდით საკმაოდ დიდ თანხებს და უკრაინის წინააღმდეგ ომს ვაფინანსებთ.
რუსეთი უკრაინას ბომბავს და იქ სიბნელეა. ამიტომ სიმბოლურად შევქმენით ველოსიპედი იმის ნიშნად და შესახსენებლად, რომ ელექტროენერგიას ჩვენ ოკუპანტისგან ვყიდულობთ. ჩვენ ეს ველოსიპედი დავმუხტეთ ქართული ენერგიით, დავმუხტეთ Power ბანკები და ვაპირებთ უკრაინას გავუგზავნოთ,“-აცხადებს ლილუაშვილი.
