Tegeta Motors Group-ს შემოსავლები გაეზარდა, მოგება - შეუმცირდა

კომპანია Tegeta Motors Group-ს შემოსავლები გაეზარდა, მოგება კი შეუმცირდა.

სატრანსპორტო სექტორში ქვეყნის ერთ-ერთმა უმსხვილემა ჯგუფმა 2019 წლის ფინანსური ანგარიში გაასაჯაროვა. ჯგუფის წლიურმა შემოსავალმა 630 მლნ ლარი შეადგინა, წლიურ ჭრილში ზრდა 47.2% -ია (+202 მლნ ლარი).

გაზრდილია საოპერაციო მოგებაც 31.8 მილიონიდან 35.4 მილიონამდე, თუმცა კლებაა მოგებაში. წლიური მოგება 2019 წელს 10.18 მლნ ლარი იყო, 47%-ით ნაკლებია 2018 წლის მაჩვენებელზე - 19.242 მლნ ლარი.

ჰოლდინგში შემავალი თავად კომპანია „თეგეტა მოტორსის“ შემოსავლებიც გაზრდილია - 316.4 მილიონამდე (+81.4 მლნ), თუმცა მოგებაში აქაც კლებაა 11.18 მლნ - დან 6.9 მილიონამდე.

ჰოლდინგში 2019 წლის ბოლოს მონაცემებით შედიოდა 14 კომპანია. TEGETA MOTORS -ი არის საქართველოში Porsche -ს, Mazda-ს, Toyota-ს და VOLVO -ს წარმომადგენელი. ასევე ვაჭრობს მძიმე სამშენებლო და სატვირთო ავტომობილებით, ავტობუსებით და ტრაილერებით, აქვს ასევე იჯარის მომსახურებაც.

კომპანიის ძირითადი საქმიანობაა ავტომობილის იმპორტირებული საბურავების, საპოხი მასალების, აკუმულატორების და სხვა სათადარიგო ნაწილების გაყიდვა, ასევე ავტომობილების ტექნიკური და სარემონტო მომსახურებების გაწევა ქვეყნის სხვადასხვა რეგიონში განთავსებულ მომსახურების ობიექტებში. კომპანია ფლობს 26 რეგიონალურ საცალო ვაჭრობისა და მომსახურების ობიექტს მთელს საქართველოში და ერთ ადმინისტრაციულ ოფისს თბილისში.

ყველა შვილობილი კომპანია ოპერირებს საქართველოში, გარდა Tegeta Motors Baku- სა და Tegeta Motors Central Asia -ისა.