შეუვალი და მკაცრები ვიქნებით - ნათია თურნავა ბიზნესს რეგულაციების დაცვისკენ მოუწოდებს
საქართველოს ეკონომიკის მინისტრი კიდევ ერთხელ განმარტავს, რომ კორონა ვირუსით ინფიცირებულთა რიცხვის მატების გამო ქვეყანაში საყოველთაო კარანტინის გამოცხადება არ იგეგმება. თუმცა ნათია თურნავა კომპანიებსა და იქ დასაქმებულებს მოუწოდებს მკაცრად დაიცვან დაწესებული ნორმები.
„ძალიან დიდი მნიშვნელობა აქვს იმას, თუ რამდენად იცავს თითოეული ბიზნეს სუბიექტი და იქ დასაქმებული ადამიანი დაწესებულ რეკომენდაციებსა და წესებს. ჩვენ მარტო ამ ბრძოლას ვერ მოვიგებთ. რა თქმა უნდა, მასშტაბური კარანტინი არ იგეგმება და არ იქნება, არც მასშტაბური დარგობრივი შეზღუდვები იქნება. მაგრამ მოხდება თუ არა ამა თუ იმ კონკრეტულ კომპანიაში ინფიცირების შემთხვევები, დიდად არის დამოკიდებული იმაზე, იცავენ თუ არა წესებს თანამშრომლები. ეს არის პირბადეები, სოციალური დისტანცია და ცნობილი და მარტივი წესები. აი, ამაში ჩვენ შეუვალები და მკაცრები ვიქნებით“,- აღნიშნა ნათია თურნავამ.
