შალვა ხეცურიანი: ბრმა დეგუსტაციაზე ღვინის გასინჯვისას მისი ისტორია არ ჩანს, მთავარი გემოა
კორონავირუსმა ღვინის სექტორში გააჩინა „ფანჯრები“, რომლითაც შესაძლოა საქართველომაც იხეიროს, - განაცხადა "ბიზნესპარტნიორთან" სომელიეთა ასოციაციის პრეზიდენტმა. შალვა ხეცურიანის განმარტებით ეს არ არის რაიმე გრანდიოზული და ძალიან მსხვილი შესაძლებლობები თუმცა ჩვენი ქვეყნისთვის ასეთი „თავისუფალი სივრცეების“ გამოყენებას დიდი მნიშვნელობა აქვს.
„უნდა გვესმოდეს, რომ ჩვენი ღვინის ეკონომიკის პოტენციალი შეუდარებლად მცირეა ვიდრე დიდი ქვეყნების, ვისთანაც კონკურენციაში შესვლა გვიწევს. ჩვენი იარაღები, რითიც ამ ფანჯრების ათვისება შეგვიძლია ძალიან ცოტაა. ერთი უპირატესობაა საქართველოსთვის - ღვინის წარმოების დიდი ისტორია, თუმცა ეს საკმარისი არ არის. მთავარი პრიორიტეტი ღვინოში გემოა, რომელიც სწორ მეღვინეობაზე და მევენახეობაზეა დამოკიდებული. ამ მიმართულებით კი საქართველოში ღვისნი მწარმოებელ განვითარებულ ქვეყნებთან შედარებით ჩამოვრჩებით. ღვინის ბაზრები ისე არ არის მოწყობილი რომ მომხმარებელმა ღვინო მხოლოდ ისტორიის გამო იყიდოს. ემოციას და დამოკიდებულებას დიდი მნიშვნელობა აქვს, თუმცა მთავარი პროდუქტის შეძენისას მაინც გემოა. როდესაც თქვენ ბრმა დეგუსტაციაზე სინჯავთ ღვინოს იქ მისი ისტორია არ ჩანს,“ - შალვა ხეცურიანი - საქართველოს სომელიეთა ასოციაციის პრეზიდენტი
სომელიეთა ასოციაციაში განმარტავენ, რომ ქვეყანას ღვინის მიმართულებით ახალ საფეხურზე სჭირდება ასვლა, რისთვისაც პირველ რიგში მეღვინეებისა და მევენახეების განათლების დონის ამაღლებაა საჭირო.
„თავი და თავი ყველაფრის არის განათლება, სადაც მძიმე მდგომარეობაა. ჩვენ უნდა ვიყიდოთ ტვინები ამ მიმართულების განსავითარებლად და ეს საერთოდ არ გვართმევს ქართველობას და მით უმეტეს ღვინის სამშობლოს სტატუსს. განათლების ყიდვა არ ნიშნავს ვინმესგან რაიმეს გადმოღებას, მაგრამ უფრო გამოცდილი ქვეყნებისგან საუკეთესო პრაქტიკის გაზიარება გაგვაძლიერებს. ჩვენ ვერ განვაცვიფრეფთ მსოფლიოს დიდი მოცულობის ღვინის წარმოებით, აქცენტი სხვა დეტალებზე უნდა გაკეთდეს,“ - შალვა ხეცურიანი - საქართველოს სომელიეთა ასოციაციის პრეზიდენტი
გაერთიანების ინფორმაციით გარდა წარმოებისა ქვეყანას რთული მდგომარეობა აქვს ღვინის ტურიზმის მიმართულებითაც. ასოციაციაში განმარტავენ, რომ სწორება უფრო მაღალმხარჯველუნარიანი დამსვენებელისკენ უნდა იყოს მიმართული და მხოლოდ მეზობელ ქვეყნებზე გათვლების გაკეთება არასწორია.
პრობლემების მოგვარების ერთ-ერთ გზას სომელიეთა ასოციაციაში უცხოელ ექსპერტთა ჯგუფის დაქირავებაში ხედავენ. გაერთიანებაში განმარტავენ, ცოდნის შემოსატანად და საჭირო სტრატეგიის შესამუშავებლად ქვეყანამ უცხოელი სპეციალისტებისგან გამოცდილების გასაზიარებლად აქტიური კამპანია უნდა დაიწყოს.
