შალვა ალავერდაშვილი: 10 000 ლარიანი ჯარიმა ძალიან დიდია
დარღვევებისთვის 31 რესტორანი, 3 სასტუმრო და 2 ღონისძიებაა დაჯარიმებული.
სასტუმროებისა და რესტორნების ფედერაციაში ამბობენ, რომ საქართველოს სხვა ქვეყნებთან შედარებით ყველაზე მაღალი ჯარიმები აქვს, რაც COVID-19-ის პანდემიის ფონზე ბიზნესისთვის დამატებითი დარტყმაა.
ფედერაციის პრეზიდენტი შალვა ალავერდაშვილი აღნიშნავს, რომ 10 000 ლარიანი ჯარიმა ძალიან დიდია და ამ თანხის მოგებაზე გასასვლელად რესტორანმა მინიმუმ 4 თვე უნდა იმუშაოს. ამასთან, არის შემთხვევები, როდესაც ლიცენზრებული ობიექტებიც დაჯარიმდა.
პანდემიის ფონზე სექტორში კრიზისია. 2020 წლის ბოლოსთვის ფედერაცია 75%-იან ვარდნას ელის, რაც ციფრებში ტურიზმიდან 2.5 მილიარდი ლარის ზარალს ნიშნავს, მკვეთრი ვარდნაა დასაქმებულთა რაოდენობაშიც. თუ გასულ წლებში ზაფხულის სეზონზე დასაქმებულთა რაოდენობა 300 000 ადამიანი იყო, ეს მაჩვენებელი ახლა 7-8 ათას ადამიანამდეა შემცირებული.
პანდემიის შედეგებთან გასამკლავებლად ტურისტული სექტორი სესხების 1 წლით გადავადებას ითხოვს. სექტორი მეტი სიცხადისთვის რეგულარული ფრენების აღდგენის კონკრეტულ თარიღებს ელოდება.
