სესხის პროცენტის სუბსიდირების პროგრამით სპორტული ინდუსტრია და კერძო ბაღებიც ისარგებლებენ
სესხის პროცენტის სუბსიდირების პროგრამით რესტორნების გარდა სპორტული ინდუსტრია და კერძო საბავშვო ბაღები ისარგებლებენ. ეს გადაწყვეტილება მთავრობის დღევანდელ სხდომაზე პრემიერ-მინისტრმა გააჟღერა.
გიორგი გახარიამ ასევე თქვა, რომ პროგრამით სარგებლობის თხოვნით სახელმწიფოს 2 000-მდე რესტორანმა მიმართა, თუმცა მოთხოვნები მხოლოდ 420-მა დააკმაყოფილა, ამის გამო ტექნიკურ მოთხოვნათა ჩამონათვალი შემსუბუქდება.
"დეკემბერში დამატებით ღონისძიებად მივიღეთ რესტორნებისთვის საბანკო სესხის სუბსიდირების პროგრამა. ის დეკემბრიდან დაიწყო და საკმაოდ დიდი მოთხოვნა აჩვენა. ეს იყო 6 თვის განმავლობაში საბანკო სესხის პროცენტის 80%-ის სუბსიდირება. დაახლოებით 2 000-მა რესტორანმა მოგვმართა შეღავათის გამოყენების თხოვნით. თუმცა, გარკვეული ტექნიკური მიზეზების გამო მოთხოვნები მხოლოდ 420-მა დააკმაყოფილა. დღეს ამ ტექნიკური მოთხოვნების შემსუბუქების გადაწყვეტილება მივიღეთ. მიზანი ის არის, რომ ამ 2000-მა რესტორანმა შეძლოს სახელმწიფოს მხარდაჭერით სარგებლობა.
ასევე ეს ღონისძიება მხოლოდ რესტორნებს არ შეეხება. მასში ჩაერთვებიან სპორტის ობიექტები და კერძო საბავშვო ბაღები. ეს ის ბიზნესებია, რომლებიც ასევე პანდემიის შედეგად დაზარალდნენ",- აღნიშნა პრემიერმა.
