სათამაშო ბიზნესზე კონტროლი მკაცრდება - რას ითვალისწინებს საკანონმდებლო ცვლილებები
სათამაშო ბიზნესი მკაცრად გაკონტროლდება, - ამას ითვალისწინებს „ლატარიების, აზარტული და მომგებიანი თამაშობების მოწყობის შესახებ“ კანონში მთავრობის ინიცირებული ცვლილები.
კანონპროექტის მიხედვით, დარეგულირდება საქართველოს ტერიტორიაზე ისეთი (არარეზიდენტი) პირების მოქმედების საკითხი, რომლებიც არ ფლობენ კანონმდებლობით გათვალისწინებულ თამაშების მიწოდების შესახებ ნებართვას.
როგორც საკომიტეტო მოსმენაზე აღინიშნა, ასეთი ოპერატორები ქართულ ბაზარზე საქმიანობენ და მათ მიერ მოწყობილი თამაშები ცალკეულ შემთხვევებში, არ ექვემდებარება კანონმდებლობით განსაზღვრულ რეგულირებას. შესაბამისად, ისინი არც მოსაკრებელს/გადასახადს იხდიან. გართულებულია დადგენა, რამდენად კეთილსინდისიერად ახორციელებენ კანონმდებლობით გათვალისწინებული მოთხოვნების დაცვას.
დარგობრივი ეკონომიკისა და ეკონომიკური კომიტეტის თავმჯდომარის, რომან კაკულიას განცხადებით, - „ნაკლები ენთუზიაზმი გვაქვს ამ კანონპროექტის მხარდამჭერისთვის, იმის გამო, რომ ჩვენ სოციალურ თემებთან დაკავშირებული სხვა საკითხების განმსაზღვრელი პროექტის მომზადების სურვილი გვქონდა. ამ დღებში ჩვენ გვქონდა კონსულტაცია და მივიღეთ დასტური, რომ რაც შეიძლება მალე გვექნება მსჯელობა მეორე კანონზეც, რომელსაც საზოგადოება ელის, რომელშიც ამ თემის სოციალური ნაწილზეა საუბარი თვითაკრძალვა იქნება თუ სხვა მთელი რიგი საკითხები, რაც კიდევ უფრო მნიშვნელოვანია“.
კომიტეტმა კენჭი უყარა და მხარი დაუჭირა წარმოდგენილ კანონპროექტს.
