საოჯახო სასტუმროები სააგენტოს "აწარმოე საქართველოში“ ერთ-ერთ პრიორიტეტად რჩება

საოჯახო სასტუმროები სააგენტოს „აწარმოე საქართველოში“ ერთ-ერთ პრიორიტეტულ მიმართულებად რჩება.

სააგენტოს ხელმძღვანელის თქმით, მცირე სასტუმროების მფლობელებს აქვთ შესაძლებლობა 500-დან 30 ათასამდე ლარის გრანტით ისარგებლონ.

„ამ პროდუქტში 90% გრანტია და თანამონაწილეობაც 20%-დან 10%-მდე დავწიეთ, რადგანაც გვესმის დღეს მეწარმეს ნაკლები აქვს. ამ პროდუქტით დაფინანსებულ პროექტების უმეტესობა სწორედ საოჯახო სასტუმროებზე მოდის. მიკროგრანტების პროგრამა არის, როგორც ეკონომიკურად, ასევე სოციალური კუთხით ძალიან მნიშვნელოვანი. მინიმუმ, იმ ადამიანებს, რომლებიც ბიზნესს იწყებენ,  უჩნდებათ შემოსავლები და ხდება სერვისების დეცენტრალიზაცია“, - აღნიშნა „აწარმოე საქართველოში“ ხელმძღვანელმა მიხეილ ხიდურელმა „ბიზნესპარტნიორის ოთხეულში“ სტუმრობისას.

ხიდურელის თქმით, კვლევები აჩვენებს, რომ მიკროგრანტების პროგრამაში 60%-ზე მეტი იყო ე.წ „გადარჩენის კოეფიციენტი“, რაც მსოფლიო პრაქტიკას თუ შევხედავთ, არის ძალიან მაღალი.