საქართველოში ყვავილების მოვლის შემსწავლელი სკოლა გაიხსნება
საქართველოში მცენარეების პირველი სასტუმრო „ბუტკო“ საგანმანათლებლო მიმართულების გაძლიერებას და ყვავილების მოვლის შემსწავლელი სკოლის გახსნას გეგმავს.
პროექტზე „ბიზნესპარტნიორს“ მცენარეების სასტუმროს თანადამფუძნებელი თამარ რაზმაძე ესაუბრა. მისი თქმით, სკოლა სავარაუდოდ შემოდგომაზე გაიხსნება და იქ მცენარეთა მოყვარულები რამდენიმედღიან საბაზისო კურსს გაივლიან.
„გვინდა, რომ მცენარეების მოყვარულებს შევასწავლოთ ყველა ის უნარი, რასაც ჩვენ ვფლობთ და მათ თავადვე შეძლონ მცენარის დარგვა, გადარგვა, შეწამვლა და ა.შ. მათ შორის, მცენარეთა მოყვარულები შეძლებენ, თავად გაუკეთონ მცენარეებს დიაგნოსტიკაც კი“,- აღნიშნა თამარ რაზმაძემ.
მისივე ინფორმაციით, საბაზისო კურსი ერთთვიანი იქნება. „როგორც იცით, ჩვენ ხშირად ვატარებთ სასწავლო "ვორკშოპებსაც" და შესაბამისად, ორიენტირებული ვართ, რომ ქვეყანაში მცენარეთა მოვლის შესახებ განათლების მიღება პოპულარული გახდეს. სწორედ ამ მიზნის გაგრძელება იქნება ამ სკოლის გახსნაც“, - განმარტა თამარ რაზმაძემ.
როგორც მცენარეების სასტუმრო “ბუტკოს“ თანადამფუძნებელი ამბობს, ამ ეტაპზე, გადაწყვეტილი არ არის, სად გაიხსნება ყვავილების მოვლის შემსწავლელი სკოლა, სავარაუდო ლოკაციად თბილისი და ტაბახმელა განიხილება.
ცნობისთვის, საქართველოში მცენარეების პირველი სასტუმრო „ბუტკო“ ტაბახმელაში მდებარეობს, სადაც არდადეგების, შვებულების თუ სხვა მიზეზით სახლიდან წასვლის პერიოდში, მომხმარებლები თავიანთ მცენარეებს მოსავლელად ტოვებენ.
