საქართველოში OZDILEK-ის მაღაზიები გაიხსნება - BEKO-ს დამფუძნებელი კომპანია საოჯახო ტექსტილის ბაზარზე შედის

საყოფაცხოვრებო ტექნიკის მაღაზიათა ქსელ Beko-ს დამფუძნებელი კომპანია „ტექნო ჰაუსი“ საოჯახო ტექსტილის ბაზარზე შედის.

როგორც კომპანიის დირექტორი მეჰმედ მელექი „ბიზნესპარტნიორთან“ აცხადებს, საქართველოში თურქული საოჯახო ტექსტილის, Ozdilek-ის ბრენდის მაღაზიები გაიხსნება.

მისი განცხადებით, Ozdilek-ის პროდუქცია ბათუმში, Beko-ს  მაღაზიაში უკვე იყიდება, სამომავლოდ დაგეგმილია Ozdilek-ის ბრენდის 2 მაღაზიის თბილისში გახსნა. რუსთავში კი მისი შეძენა BEKO-ს მაღაზიაში იქნება შესაძლებელი.

„ამ ბიზნესის გაფართოებას ბათუმიდან ვიწყებ. თუ მომხმარებელმა ეს სიახლე კარგად მიიღო და გაყიდვებიც მისაღები აღმოჩნდა, ქსელს აუცილებლად გავაფართოვებთ. ვინაიდან, ბაზარზე ახალი შემოსულები ვართ, მომხმარებელს შეეძლება Ozdilek-ის ბრენდის საოჯახო ტექსტილი თურქულ ფასებთან შედარებით, 20%-ით იაფად შეიძინოს,“ - აცხადებს მელექი.

კითხვაზე, რატომ გადაწყვიტა „ტექნო ჰაუსმა“ საყოფაცხოვრებო ტექნიკის პარარელურად, საოჯახო ტექსტილის ბიზნესში შესვლა, მელექი განმარტავს, რომ ეს ნიშა საქართველოში თავისუფალი და პროდუქტი, საკმაოდ მოთხოვნადია.

მისივე ინფორმაციით, პროექტში საწყის ეტაპზე $600 000-ის ინვესტიცია ხორციელდება.

შეგახსენებთ, Beko საქართველოში 98  გაყიდვის წერტილს  ფლობს, აქედან 72 მაღაზიაა. თანამშრომლობს მსხვილ სავაჭრო ქსელებთან, როგორიც არის „ბრიკორამა“, „დომინო“, „გორგია“ და „ზოდი“,  ასევე, 20–ზე მეტ  ინტერნეტ მაღაზიასთან.