"საქართველოს რკინიგზა" წელს ტვირთბრუნვის ზრდის ტრენდის შენარჩუნებას ელის
„საქართველოს რკინიგზა“ 2021 წელს, ტვირთბრუნვის ზრდის ტრენდის შენარჩუნებას ელის. პანდემიის გათვალისწინებით, ზრდა დაახლოებით 3-4%-ის ფარგლებში იქნება.
„ჩვენი პროგნოზით, 2021 წელს ტვირთბრუნვა 11 მლნ-დან 11.5 მლნ ტონამდე გაიზრდება, - განაცხადა „ბიზნესპარტნიორში“ სტუმრობისას „საქართველოს რკინიგზის“ გენერალურმა დირექტორმა დავით ფერაძემ.
მისი თქმით, პანდემიის დროსაც კი, რკინიგზაზე სატვირთო გადაზიდვა 1 საათით არ შეჩერებულა.
დავით ფერაძემ განმარტა, რომ „საქართველოს რკინიგზის“ წარმატებით ფუნქციონირებისთვის აუციელებელია დერეფნის მონაწილე ყველა ქვეყნის აქტიურობა.
„შუა დერეფანში ჩვენ ვართ ძალიან პატარა რკინიგზა, პატარა ქვეყანა. ჩვენი გაძლიერება, მაგალითად, ახალი ლოკომოტივის დამატება თუ პროცესების გამარტივება არ ქმნის ამინდს ამ დერეფანში. ეს უნდა იყოს სინქრონიზებული პროცესი. რთულია პატარა კომპანიიდან დიდ კომპანიებში პროცესების „დალაგება“, - აღნიშნა დავით ფერაძემ.
11 მლნ ტონა ტვირთი და 2%-იანი ზრდა - ამ მაჩვენებლით დაასრულა 2020 წელი “საქართველოს რკინიგზამ.”
სარკინიგზო გზით გადაზიდულ ტვირთებში ზრდა ადგილობრივი და ტრანზიტული ტვირთების ზრდით შენარჩუნდა. გასულ წელს რკინიგზით საქართველო დერეფანში 5.5 მლნ ტონა ტრანზიტული ტვირთი გადაიზიდა.
