"რკინიგზის ტელეკომმა" 2019 წელი ზარალით დაასრულა

საქართველოსა და რეგიონის ქვეყნებისთვის ინტერნეტის მომწოდებელი „რკინიგზის ტელეკომი“ ზარალის მკვეთრ ზრდაზე აცხადებს.

კომპანიამ 2019 წელი 2.65 მლნ ზარალი მიიღო, 2018 წელს კი მხოლოდ 120.4 ათასის ზარალი ფიქსირდებოდა. ზარალი ძირითადად 3.12 მილიონის ფინანსურ ხარჯს უკავშირდება.

„რკინიგზის ტელეკომს“ 2019 წელს 6.39 მლნ ლარის შემოსავალი ჰქონდა. ზრდა წლიურ ჭრილში 10.7%-ია. ძირითადი შემოსავალი 4.83 მლნ იყო არხის იჯარა. 1.30  მლნ არხის მომსახურება. საოპერაციო ზარალი კი, 1 მლნ აღემატებოდა.

„რკინიგზის ტელეკომი“ საბითუმო კლიენტებს უზრუნველყოფს სატელეკომუნიკაციო სერვისებით - ინტერნეტის მიწოდება ოპტიკურ-ბოჭკოვანი კაბელით, ინტერნეტის მოცულობის გადაცემა, ოპტიკურ- ბოჭკოვანი კაბელის და სხვა სატელეკომუნიკაციო ინფრასტრუქტურის იჯარა, კოლოკაცია. 

აღსანიშნავია, რომ "კავკასუს ონლაინისა“ და შპს "რკინიგზის ტელეკომის“  წილის პირდაპირ და არაპირდაპირ 100%-ის მფლობელ კომპანიაში "ნელგადი ლიმითედში“ ფიზიკურ პირ ხვიჩა მაქაცარიას კუთვნილი წილის 49%-ის ფიზიკურ პირ ნასიბ ჰასანოვის მიყიდვის გამო კომუნიკაციების კომისიამ "კავკასუს ონლაინში“ სპეცმმართველი შეიყვანა. შესაბამისად, „კავკასუს ონლაინის“ შვილობილ კომპანიებში პარტნიორის უფლებამოსილება განხორციელდება  მხოლოდ სპეციალური მმართველის მიერ მინიჭებული უფლებამოსილების ფარგლებში.

კომისიამ გასხვისებული წილის უკან დაბრუნებას ითხოვს.