რესტორანი ქვევრი: იდეალური დროა შეზღუდვების შემსუბუქებისთვის

რესტორანი „ქვევრის“ დამფუძნებელი ლაშა ბასლანძე საკოორდინაციო საბჭოს გადაწყვეტილებას, კვების ობიექტებისთვის შაბათ-კვირის შეზღუდვის მოხსნასთან დაკავშირებით დადებითად აფასებს.

როგორც ლაშა ბასლანძე “ბიზნესპარტნიორთან“ ამბობს, ცოტაც და სიტუაცია პანდემიამდელ პერიოდს დაუბრუნდება.

„ძალიან კარგად ვიცი როგორია ეპიდვითარება და შემიძლია ვთქვა, რომ იდეალური დროა შეზღუდევბის შემსუბუქებისთვის. სასიხარულოა შაბათ-კვირის შეზღუდვის გაუქმება, რადგან საცოდაობა იყო უქმე დღეებში რესტორნის დაკეტვა. ვფიქრობ, კარგი შედეგი ექნება ამ გადაწყვეტილებას და მომხმარებლის რაოდენობაზეც დადებითად იმოქმედებს. თუ ყველაფერი კარგად წავიდა, იმედი მაქვს სრულად მოხსნიან შეზღუდვებს,“ – აღნიშნავს, ლაშა ბასლანძე.

შეგახსენებთ, რომ საკოორდინაციო საბჭოს გადაწყვეტილებით, კვების ობიექტებისთვის შაბათ-კვირას ღია სივრცეში მუშაობა დაშვებული ხდება. რეგულაცია უკვე 22 მაისიდან შემსუბუქდება. ასევე, ე.წ. კომენდატის საათი შემცირდა. გადაადგილებაზე შეზღუდვა 23:00 საათიდან 05:00 საათამდე იქნება.  

შეზღუდვა ძალაშია ისეთი სოციალური ღონისძიებების გამართვასთან დაკავშირებით, როგორიცაა, ქორწილი, ქელეხი, ბანკეტი და სხვადასხვა სახის იუბილე.