რა შეიცვალა "დონაში" - ბათუმის საკონდიტრომ მუშაობა დღეს განაახლა

1-თვიანი პაუზის შემდეგ ბათუმის ერთ-ერთმა პოპულარულმა საკონდიტრო "დონამ“ მუშაობა დღეს განაახლა. როგორც „ბიზნესპარტნიორს“ ობიექტის დამფუძნებელმა და მესაკუთრე თამილა ბეჟანიძემ განუცხადა, „დონაში“ ახალი წესები ამოქმედდა. კერძოდ, გაკონტროლდება საკონდიტროში შემსვლელთა ნაკადი.

„5 მომხმარებელზე მედი დარბაზში აღარ დაიშვება. გარდა ამისა, გაგრძელდება უსაფრთხოების დაცვის იმ წესების დაცვა, რაც დადგენილია და რასაც ისედაც ვიცავდით, ვგულისხმობ, თერმოსკრინინგს როგორც შემომსველელი კლიენტების, ისე თანამშრომლების. სამსახურში დავაბრუნეთ აბსოლუტურად ყველა თანამშრომელი და მუშაობენ ცვლებში, ისე, როგორც იყო ადრე,“ - აცხადებს თამილა ბეჟანიძე.

„დონას“ დამფუძნებელი არ საუბრობს იმ ზარალზე, რაც კომპანიამ დახურვის შედეგად, 1 თვის განმავლობაში მიიღო, თუმცა საუბრობს მოლოდინებზე და აცხადებს, რომ შექმნილი ეპიდსიტუაციიდან გამომდინარე, კომპანიის შემოსავლები სავარაუდოდ შემცირებული იქნება.

„ველოდებით იმას, რომ მომხმარებელის ნაკადი იმაზე ნაკლები იქნება, ვიდრე აქამდე გვყვავდა, რადგან თვითონ ქალაქი არ არის აქტიური,“ - აცხადებს თამილა ბეჟანიძე. მისი განცხადებით, საწყის ეტაპზე საკონდიტრო შემცირებული ასორტიმენტით იმუშავებს, სრულ აღდგენას კი მოთხოვნა განსაზღვრავს.

კაფე-საკონდიტრო "დონა" 31 აგვისტოს დაიხურა, მას შემდეგ, რაც იქ მომუშავე გამყიდველ-კონსულტანტს ვირუსი გამოუვლინდა. ვირუსი დაუდგინდა ერთ-ერთ მეპატრონესაც.