პური გაძვირდა

საქართველოში ფქვილი გაძვირდა, რამაც გავლენა უკვე იქონია პურის ფასზე. დღეიდან, რამდენიმე საწარმო, პურს ქსელში 15 თეთრით ძვირად გაყიდის. გაძვირების ძირითად მიზეზად საერთაშორისო ბაზრებზე ხორბალის ფასის ზრდა სახელდება.

კომპანია "მამა-პაპურის" დირექტორი ზაზა ჩიხაშვილი ამბობს, რომ პურზე ფასი 15-20 თეთრით არის მომატებული. "ჩვენი მაღაზია ქალაქის 400-500 მაღაზიას ამარაგებს პურით, რეალურად ძალიან რთული პერიოდია, არ გვინდა ფასის მომატება, რადგან ვხედავთ ქვეყანაში რა მდგომარეობაა, მაგრამ იძულებულები ვართ ფასი მოვუმატოთ, რადგან უბრალოდ სხვა გზა არ არის", - ამბობს ჩიხაშვილი.

კორონავირუსის ახალი ტალღის ფონზე, ქვეყნებმა ხორბლის მარაგების გაზრდა დაიწყეს, რამაც მსოფლიოში ხორბალზე მოთხოვნა 30%-ით გაზარდა. თუ სექტემბერში ერთი ტონა ხორბალი 200 დოლარი ღირდა, დღეისათვის საშუალოდ, 250 დოლარას აჭარბებს.

გაძვირების კიდევ ერთი მიზეზი ლარის გაუფასურებაა. ვინაიდან, ხორბლის 90% იმპორტირებულია და ის რუსეთიდან შემოდის.