"პრაიმლაბი" მაღალტექნოლოგიურ ლაბორატორიას ხსნის

საქართველოში მაღალტექნოლოგიური მოლეკულურ-დიაგნოსტიკური ლაბორატორია იხსნება.

ლაბორატორიას კომპანია "პრაიმლაბი" სააგენტოს „აწარმოე საქართველოში“ ფარგლებში გახსნის. კომპანია ისარგებლებს, როგორც სესხის თანადაფინანსების კომპონენტით, ამასთანავე საკრედიტო-საგარანტიო მექანიზმითაც. კერძოდ, პირველი 3 წლის განმავლობაში სესხის პროცენტის თანადაფინანსებას სააგენტო „აწარმოე საქართველოში“ განახორციელებს და ასევე, სესხის ძირი თანხის 90%-ის გარანტორი სახელმწიფო იქნება. სააგენტოს დახმარებით განხორციელებული პროექტის ინვესტიციის ჯამური 715 000 ლარს შეადგენს.

ლაბორატორია „პრაიმლაბი“ 6 თვეში ამოქმედდება, წლიურად 140 000-ზე მეტ ანალიზის ჩატარებას შეძლებს, ყველა განხრით, თუმცა პანდემიის ვითარებიდან გამომდინარე უპირატესობა მიენიჭება კოვიდ 19-ის პისიარ ტესტებს. კომპანია ამოქმედების პირველ ეტაპზე 17 ადამიანს დაასაქმებს, ხოლო სამომავლოდ, საერთაშორისო პროექტებში ჩართვას და დასაქმებულთა რიცხვის გაზრდას გეგმავს.

შეგახსენებთ, რომ ლაბორატორიის გახსნის ან გაფართოების შემთხვევაში, მეწარმე სუბიექტს შეუძლია პარალელურად ისარგებლოს, როგორც სესხის პროცენტის თანადაფინანსების, ამასთანავე საკრედიტო-საგარანტიო მექანიზმის კომპონენტით.