პიტერ ვიბლერი: კერძო სექტორი ეს არის მძღოლი მანქანაში და მთავარი მამოძრავებელი განვითარებაში
კერძო სექტორი ეს არის მძღოლი მანქანაში, ანუ მთავარი მამოძრავებელი საქართველოს განვითარებაში, - ამის შესახებ „ბიზნესპარტნიორთან“ USAID-ის მისიის დირექტორი საქართველოში პიტერ ვიბლერი საუბრობს.
მისი თქმით, სწორედ ამიტომ, USAID-ის სურვილია სულ უფრო გაზარდოს პარტნიორობა კერძო სექტორში მომუშავე ორგანიზაციებთან, იქნება ეს საერთაშორისო, თუ ქართული კომპანიები. ერთ-ერთი ასეთი კომპანია „აჭარა ჯგუფია“, რომელთანაც USAID-მა თანამშრომლობის მემორანდუმი გააფორმა.
„მიზანი არის ის, რომ შეიქმნას სამუშაო ადგილები, გაიზარდოს შემოსავლები, გაჩნდეს მეტი ეკონომიკური შესაძლებლობა, განსაკუთრებით საქართველოს დიდ ქალაქებს მიღმა, სასოფლო დასახლებებში, სადაც ასეთი შესაძლებლობები ყველაზე მეტად საჭიროა. ვფიქრობ, საქართველოს ჰყავს ბევრი ნიჭიერი ადამიანი, ეს ახალგაზრდა ადამიანები ხშირად ეძებენ სამუშაოს და ვერ პოულობენ. ვფიქრობ, „აჭარა ჯგუფმა“ შექმნა ბევრი შესაძლებლობა და გააჩინა ნიჭიერი ახალგაზრდების საჭიროება, რითაც მათ მისცა შანსი ნახონ სამუშაო და გააძლიერონ საკუთარი ოჯახები აქ, ამ მშვენიერ ქვეყანაში. და რასაკვირველია, ქალთა გაძლიერებაც არის მიზანი, რომელსაც როგორც შეერთებული შტატები, ასევე საქართველო იზიარებს. ერთი სული მაქვს ვნახო შედეგები, რომელიც ამ პარტნიორობის შედეგად შეიქმნება მომავალში,“ - განუცხადა „ბიზნესპარტნიორს“ პიტერ ვიბლერმა.
