"პანდემია შესაძლებლობაა კომპანიებისთვის, შეცვალონ ბიზნეს-მოდელი და მოერგონ ახალ რეალობას"

პანდემიამ მსოფლიო წესრიგი მნიშვნელოვნად შეცვალა. ბოლო პერიოდში ბევრს საუბრობენ ვირუსით გამოწვეული დაბრკოლებების შესაძლებლობად ქცევის სტრატეგიაზე. მსოფლიო ბანკის რეგიონული დირექტორი სამხრეთ კავკასიაში სწორედ იმ რესურსებზე საუბრობს, რომლის სასიკეთოდ გამოყენებაც ქვეყანას სამომავლოდ წაადგება.

„პირველი და ყველაზე დიდი შესაძლებლობა, რასაც არსებული მოცემულობა იძლება, ეს არის ციფრული ეკონომიკის განვითარება. ჩვენ EBRD-თან და სხვა პარტნიორებთან ერთად ჩავატარეთ საწარმოთა კვლევა, გამოვკითხეთ 500-მდე სხვადასხვა ფირმის აღმასრულებელი დირექტორები. სტატისტიკამ აჩვენა, რომ სამწუხაროდ, ბევრი კომპანია გაკოტრდა და დაიხურა. ის კომპანიები კი, რომლებიც გადაეწყვნენ ციფრულ ეკონომიკაზე, არათუ არსებობა შეინარჩუნეს, გაყიდვებიც 30%-ით გაზარდეს. ეს ყველაფერი - გლობალური პანდემიის მიმდინარეობისას. ეს შესანიშნავი შესაძლებლობაა დაწესებულებებისთვის, რომ თავიანთი ბიზნეს-მოდელი შეცვალონ და მოერგონ ახალ რეალობას,“ - განაცხადა გადაცემაში "ბიზნესპარტნიორის ოთხეული" სებასტიან მოლინეუსმა.

საერთაოშორისო საფინანსო ორგანიზაციის რეგიონული დირექტორი ინტერნეტიზაციის პროცესზეც საუბრობს და აღნიშნავს, რომ ასეულობით სოფელს ფართოხაზოვანი და სწრაფი ინტერნეტი უკვე მიეწოდება. მისი შეფასებით, სასურველია, ფოკუსირება ონლაინ სერვისების პოპულარობის გაზრდაზე გაკეთდეს და ზოგადადაც, არაერთი ტრადიციული ინდუსტრია - ტრანფორმირდეს.