"ნიკორამ" პანდემიური წლის პირველი ნახევარი 4,5 მლნ-ნიანი ზარალით დაასრულა
გაზრდილი შემოსავალი და შემცირებული ზარალი - სს „ნიკორამ“ ინვესტორებს ნახევარწლიური ანგარიში წარუდგინა.
კომპანიის შემოსავლებმა 2020 წლის 6 თვეში 285.4 მლნ გადააჭარბა. წლიურ ჭრილში ზრდა 17.8%-ია (43.17 მლნ).
11.5-დან 14.46 მილიონამდეა გაზრდილი საოპერაციო მოგება. რაც შეეხება 6 თვის ზარალს კომპანიამ 4.48 მლნ-ით იზარალა, რაც 2-ჯერ ნაკლებია შარშან ამავე პერიოდის მაჩვენებელზე.
"ნიკორა" თავის შვილობილ კომპანიებთან ერთად საკვები პროდუქტების წამყვანი მწარმოებელი და საცალო გამყიდველია ქართულ ბაზარზე. ჯგუფი აწარმოებს 500-მდე სახეობის პროდუქტს. ფლობს სავაჭრო ქსელებს და სადისტრიბუციო ბიზნესს.
„ნიკორას“ გამოშვებული აქვს 28 მილიონის ობლიგაციები, რომლებსაც ერიცხება წლიური 4%+3თვის TIBR.
"ნიკორას" ობლიგაციების კონტრაქტი ითვალისწინებს გარკვეულ შემზღუდველ პირობებს. ეს გულისხმობს გარკვეული შემზღუდველი ფინანსური კოეფიციენტების დაკმაყოფილებას, კერძოდ, 31 დეკემბრისთვის დასრულებული აუდირებული და 30 ივნისისთვის დასრულებული არა-აუდირებული კალენდარული წლისთვის:
1) DEBT/EBITDA- კოეფიციენტმა არ უნდა შეადგინოს 3.5-ზე მეტი
2) ICR- კოეფიციენტი არ უნდა იყოს 2.8-ზე ნაკლები
3) DSCR - კოეფიციენტი არ უნდა იყოს 1.1-ზე ნაკლები.
კოეფიციენტები იანგარიშება სს ნიკორას კონსოლიდირებულ ფინანსურ ანგარიშგებაზე დაყრდნობით.
კომპანიის ცნობით, 2020 წლის 30 ივნისისთვის დასრულებული არა-აუდირებული კალენდარული წლისთვის ჯგუფი აკმაყოფილებს ყველა კოეფიციენტს.
