ნიკოლოზ ხუნძაკიშვილი: ცირკულარული ეკონომიკის მოდელი გლობალური მიდგომაა და საქართველო მისი მონაწილე უნდა იყოს
ცირკულარული ეკონომიკის მოდელზე გადასვლას კერძო სექტორის წარმომადგენელთა ნაწილი ევოლუციურ პროცესს უწოდებს. „ეფეს საქართველოს“ კორპორაციულ საქმეთა დირექტორი, ნიკოლოზ ხუნძაკიშვილი „ბიზნესპარტნიორთან“ აცხადებს, რომ ამ მიმართულებით არა მხოლოდ ბიზნესისა და სახელმწიფოს, არამედ სამოქალაქო სექტორის ყველა წარმომადგენლის ჩართულობაა საჭირო.
„ცირკულარული ეკონომიკა როგორც კომპანიების, ასევე ეროვნულ, თუ გლობალურ დონეზე თანამედროვე ეკონომიკის ძირითადი მიმართულებაა. ეს იწვევს რესურსების ოპტიმიზაციას, ხარჯთეფექტურობასა და ნარჩენების წარმოშობის შემცირებას. ეს საშუალებას გვაძლევს, რომ ნარჩენები ხელახალ რესურსად გამოვიყენოთ და ამით რესურსისა და ხარჯების ოპტიმიზება გავაკეთოთ. ეს საუკეთესო მოდელია, თუ როგორ უნდა ითანამშრომლოს საზოგადოების თითქმის ყველა სექტორმა. მომხმარებლიდან დაწყებული, ხელისუფლებითა და ბიზნეს საზოგადოებით დამთავრებული.
ამ ეტაპზე საკანონმდებლო ჩარჩო არ არსებობს, თუმცა ცნობადობის ამაღლების საკმაოდ ბევრი ღონისძიება იმართება. თუმცა, ეს არ არის ერთჯერადად გადასვლის სფერო. პრაქტიკულად, ევოლუციური პროცესია, რაც იმას ნიშნავს, რომ უნდა ვიცოდეთ ნარჩენების სწორი მართვა იმისთვის, რომ შემდეგ ამ მოდელზე გადავიდეთ. ეს მხოლოდ საქართველოს გასაკეთებელი არაა, გლობალური მიდგომაა, საქართველო კი მისი მონაწილე უნდა იყოს“,- განაცხადა ხუნძაკიშვილმა.
შეგახსნებთ, რომ გარემოს დაცვისა და სოფლის მეურნეობის სამინისტრო ცირკულარული ეკონომიკის მოდელზე გადასვლის სტრატეგიაზე მუშაობს.
