ნათია თურნავა საწვავის გაძვირებაზე: კონკურენცია გარანტიაა, რომ ფასები სწრაფად არ გაიზრდება
ეკონომიკის მინისტრის განცხადებით, საწვავის ფასების ზრდას მსოფლიო ბაზარზე არსებული ვითარება განაპირობებს. თუმცა, ნათია თურნავა ქართულ ბაზარზე არსებულ კონკურენციაზე საუბრობს, რაც მისი აზრით, საწვავზე ფასების სწრაფად ზრდას გამორიცხავს.
"ბენზინის ფასები მნიშვნელოვნად არის დამოკიდებული მსოფლიო ბაზარზე არსებულ ნავთობსა და ნავთობპროდუქტების ფასებზე. ბოლო დროს, სამწუხაროდ, არის ზრდის ტენდენცია. რა თქმა უნდა, ყველაფერს გავაკეთებთ იმისთვის, რომ ეს ასე პირდაპირ არ აისახოს ამ ბაზარზე. პირველ რიგში, რაც უკვე არის გაკეთებული, ესაა ძალიან დიდი კონკურენცია ამ ბაზარზე. კონკურენცია თავისთავად იმის გარანტიაა, რომ ფასები ძალიან სწრაფად ნამდვილად არ გაიზრდება",- განაცხადა თურნავამ.
შეგახსენებთ, რომ ნავთოპროდუქტების იმპორტიორთა კავშირი საწვავზე ფასების კიდევ უფრო ზრდას პროგნოზირებს. მიზეზად კავშირი მსოფლიო ბაზარზე არსებულ ვითარებას ასახელებს.
