მსხვილ საწარმოებს ჰაერში მავნე ნივთიერების გაფრქვევის შემცირების ახალი ვალდებულება ეკისრებათ
მსხვილ საწარმოებს, მათ შორის მეტალურგიულ ქარხნებს, მძიმე ინდუსტრიას, ქიმიური მრეწველობას, ჰაერში მავნე ნივთიერების გაფრქვევის შემცირების კუთხით ახალი ვალდებულება უჩნდებათ.
როგორც გარემოს დაცვისა და სოფლის მეურნეობის მინისტრმა განაცხადა, რეგულაცია ძალაში მიმდინარე წლიდან შევა.
„შესაბამისი კანონმდებლობა ბიზნესთან მუდმივი კომუნიკაციით და სამოქალაქო საზოგადოების აქტიური ჩართულობით მომზადდა. ამასთან, საერთაშორისო პარტნიორებთან ერთად ჩვენ უკვე დავიწყეთ სამინისტროში ამ მიმართულებით შესაძლებლობების განვითარება. შედეგად კი 2022 წლიდან გარემოს დაცვითი ზედამხედველობის დეპარტამენტში ახალი მიმართულება ჩამოყალიბდება, რომელიც იზრუნებს ამ პასუხისმგბლობის კანონმდებლობის სწორად იმპლემენტაციაზე. ამავე პაკეტის ფარგლებში, რაც 2020 წლის ხელშესახებ შედეგად შეიძლება ჩავთვალოთ, არის 2020-2022 წლების ქალაქ რუსთავის ჰაერის ხარისხის მართვის გეგმა, რომელიც ითვალისწინებს 60 მილიონიან დანახარჯებს ეკოლოგიური მდგომარეობის გაუმჯობესების მიზნით, რაც მოიცავს სატრანსპორტო პოლიტიკას, გამწვანებას და ასე შემდეგ.“ -განაცხადა ლევან დავითაშვილმა.
