ლარის კურსის მერყეობაზე ნაკლებად ვართ დამოკიდებული – “ჩემი რანჩო“
“ჩემი რანჩო" ადგილობრივი წარმოებაა, არსებული საოპერაციო და ყველა სხვა ძირითადი ხარჯი/შემოსავალი ლარშია. კომპანიას სესხებიც ლარში აქვს და ლარის კურსის ცვალებადობა ამ ეტაპზე კომპანიას მძიმე ტვირთად არ აწვება.
როგორც კომპანიის დამფუძნებელი ვანო იოსელიანი „ბიზნესპარტნიორთან“ განმარტავს, ერთადერთი არის ცხოველებისთვის კომბინირებული საკვები, რომელიც იმპორტირებულია, თუმცა საკვების წარმოებაც კომპანიის საკუთრებაში არსებულ ფერმაში გაკეთდა და აგვისიტოს დასაწყისში ექსპლუატაციაში გაეშვა. შესაბამისად, „ჩემი რანჩო“ ლარის კურსის მერყეობაზე ნაკლებადაა დამოკიდებული.
კითხვაზე, დგას თუ არა ფასების გადახედვის საჭიროება, იოსელიანი აღნიშნავს, რომ ამის საჭიროება მხოლოდ ინფლაციის პირობებში დადგება. კერძოდ, თუ მნიშვნელოვნად გაიზარდა შესაფუთი მასლების ფასი, მკვთრად გაძვირდა ცხოვრება და ა.შ.
„ჩვენს შემთხვევაში ეს უფრო დამოკიდებულია ინფლაციის დონესთან, რომელიც დღეს დაგეგმილი ნიშნულის ფარგლებშია,“ - აცხადებს იოსელიანი.
შეგახსენებთ, ვანო იოსელიანმა სოკოს ბიზნესიდან მებოცვრეობაში 2017 წლის ბოლოს გადაინაცვლა. გარდაბანში, სოფელ გამარჯვებაში არსებული კომპლექსი მოიცავს როგორც ფერმას, გადამამუშავებელ საწარმოს, ისე ლაბორატორიებს და სასაკლაოს.
