ლარის გაუფასურებამ და ტრანსპორტირების ხარჯის გაზრდამ სამომხმარებლო ტექნიკა გააძვირა

ლარის კურსის გაუფასურებისა და ჩინეთიდან ტრანსპორტირების ხარჯების ზრდის გამო, ტექნიკის ნაწილზე ფასები გაიზარდა.

მოლოდინია, რომ მეორე კვარტლის დაწყებამდე კომპანიებს არსებული მარაგები ამოეწურებათ და შედეგად, ფასების ზრდის მიმართულებით კორექტირება ისევ მოხდება. ამავდროულად ჩინეთიდან ტრანსპორტირების ხარჯის გაძვირების გამო კომპანიების ნაწილმა ჩინეთიდან იმპორტი დროებით შეაჩერა.

„ლარის კურსი და ლოგისტიკა - ეს ორი ძირითადი მიზეზია, რაც ტექნიკის ფასებს აძვირებს. ჩვენ ტრანსპორტირების ხარჯების ზრდის გამო, დროებით ჩინეთიდან საერთოდ შევაჩერეთ იმპორტი. 2800-3000 დოლარი იყო გზის ხარჯი, დღეს კი 8 000-9 000-ის ფარგლებში მერყეობს. ვისაც ჩინეთიდან აქვს იმპორტი, მათ განსაკუთრებით გაუჭირდებათ პროდუქციაზე ფასების შენარჩუნება. თუ აქამდე არ გაუზრდიათ ფასები, ზაფხულის სეზონიდან აუცილებლად მოუწევთ. ჩვენ ერთი პლუსი გვაქვს, პროდუქციის 80% თურქეთიდან ჩამოგვაქვს. თურქეთის ქარხნები ამ ეტაპზე თითქმის სრულად აკმაყოფილებენ ჩვენს მოთხოვნას,“ - განაცხადა მეჰმედ მელექმა.

მისივე განმარტებით, ტრანსპორტირების ხარჯები ტექნიკის ფასებს 7-10%-ით გაზრდის.