ქვეყნის ჰოსპიტალურ სექტორში დისბალანსია - რა ვერ შეძლო დავით სერგეენკომ

ქვეყნის ჰოსპიტალურ სექტორში დისბალანსია - დავით სერგეენკოს აზრით, ეს ერთ-ერთია იმ საკითხების ჩამონათვალს შორის,რაც მან წლების განმავლობაში ვერ შეძლო. საქმე ეხება დისბალანსს კერძო და სახელმწიფო კლინიკებს შორის. სერგეენკოს აზრით, ეს არის პრობლემა, რომელიც აუცილებელ რეაგირებას საჭიროებს.

„ესეთი პრეცედენტი არავის აქვს. არ ვარ კერძო სექტორის მოწინააღმდეგე, მაგრამ ასეთი დისბალანსი არსად არ არის. ვგულისხმობ იმას,როდესაც 90% კლინიკებს შორის არის კერძო მომგებიანი და მხოლოდ 10%-ია - სახელმწიფო. გამონაკლისია ჰოლანდია, სადაც კლინიკების 100% არის კერძო.აქედან კი 70% - არამომგებიანია.  ისინი იმართებიან აკადემიური წრეების, უნივერსიტეტების მიერ. აი, ამ დისბალანსის შეცვლა ვერ შევძელი,“ - განაცხადა პარლამენტის ვიცე-სპიკერმა, ჯანდაცვის ექსმინისტრმა დავით სერგეენკომ გადაცემაში "ბიზნესპარტნიორის ოთხეული".

ვიცე-სპიკერის განმარტებით, აუცილებელია კერძო და სახელმწიფო კლინიკებს შორის არსებობდეს ბალანსი, ეს ბალანსი კი პანდემიის ან საომარი ვითარებების დროს სწრაფი რეაგირებისთვის არის საჭირო.

„ჩემი ეს განცხადება არ ნიშნავს, რომ კერძო ინდუსტრია ცუდია. არ,ა ძალიან კარგია, მაგრამ უნდა იყოს სწორი ბალანსი. სახელმწიფოები ცდილობენ რომ მინიმუმ მესამედი შეინარჩუნონ მართვაში. ეს სწორედ ასეთი ვითარების გამო ხდება. პანდემია და ომი არის პერიოდი, როცა დროული რეაგირებაა საჭირო. კერძო სექტორს კი სჭირდება ხანგრძლივი მოლაპარაკებები ფუნქციონირებისთვის. ასეთ შემმთხვევებში კი დროის რესეურსი შეზღუდულია,“ - ამბობს დავით სერგეენკო.