კონსორციუმი ხელისუფლებას ანაკლიის პროექტის გაგრძელებისკენ მოუწოდებს
ანაკლიის პორტის პროექტს ჩამოშორებული ინვესტორები მთავრობას საკუთარი ინტერესების გვერდზე გადადებას და პროექტის გაგრძელებისკენ მოუწოდებენ.
ანაკლიის განვითარების კონსორციუმი ოფიციალურ განცხადებას აქვეყნებს და 2021 წლის ბიუჯეტის პროექტში არსებულ ჩანაწერზე მიუთითებს, რომ შესაძლოა საარბიტრაჟო დავის გამო მაღალი რეპუტაციის ინვესტორი ვერ შეირჩეს.
„საქართველოს მთავრობა პორტის პროექტთან დაკავშირებული ახალი ტენდერის წარმატებას თავადვე აყენებს ეჭვქვეშ. ეს იმიტომ, რომ არცერთი სანდო ინვესტორი არ მიიღებს მონაწილეობას ტენდერში ისეთ გარემოებებში, როცა მიმდინარეობს საარბიტრაჟო დავები“, - ნათქვამია განცხადებაში.
ინვესტორი განცხადების მიხედვით ფიქრობს, რომ არის დიდი ალბათობა საქართველოს მთავრობა დავას წააგებს და სახელმწიფოს მოუწევს მნიშვნელოვანი ოდენობის ზიანის ანაზღაურება.
„ანაკლიის განვითარების კონსორციუმის“ ინვესტორები კვლავ რჩებიან მზადყოფნაში, რომ განაახლონ ანაკლიის პორტის პროექტი, მოიწვიონ ახალი ინვესტორები და პარტნიორები, რომ საქართველომ შეძლოს იმ პოტენციალის რეალიზება, რაც ამ პროექტს მოაქვს", - ნათქვამია ბობ მაიერის განცხადებაში.
