"კნაუფმა" მშრალი თაბაშიროვანი ნარევების ახალი საწარმო გახსნა

კომპანია „კნაუფმა“ მშრალი თაბაშიროვანი ნარევების ახალი საწარმო გახსნა.

გახსნის ცერემონიაზე ეკონომიკის მინისტრმა განაცხადა, რომ „კნაუფის“ ინვესტიცია მნიშვნელოვანია საქართველოსთვის, რადგან ეს არ არის მხოლოდ 30 მლნ ევროს ინვესტიცია, რაც ბოლო წლების განმავლობაში კომპანიის მიერ განხორციელდა.

„კნაუფს“ შემოაქვს ხარისხის ახალი სტანდარტები სამშენებლო სექტორში. ასევე ძალიან მნიშვნელოვანია ის პროფესიული ცოდნა, რომელიც კომპანიამ ჩამოიტანა და მის მიერ დანერგილი ტექნოლოგიები“, - განაცხადა ეკონომიკის მინისტრმა.

კომპანიამ საქართველოში საქმიანობა 1998 წლიდან დაიწყო, ხოლო საწარმო, რომელიც „კნაუფის“ სამშენებლო მასალებს აწარმოებს, 2009 წლიდან ფუნქციონირებს. კომპანია საქართველოში აწარმოებს თაბაშირმუყაოს ფილებს, მოთუთიებული ფოლადის პროფილებს, დასაგრუნტ მასალას და მზა ფითხებს, ახლა კი უკვე ფუნქციონირებს მშრალი თაბაშიროვანი ნარევების საწარმოც. ამ ეტაპზე საწარმოში ჯამურად 100 ადამიანია დასაქმებული.

როგორც ლევან დავითაშვილმა აღნიშნა, მნიშვნელოვანია, რომ კომპანიის მიერ სამშენებლო სექტორში ჩართული 1000-ზე მეტი ადამიანის გადამზადება მოხდა, რომლებიც თანამედროვე სამშენებლო ტექნოლოგიებს იყენებენ. კერძოდ, კომპანია „კნაუფი“-ს ბაზაზე, ევროპული სტანდარტის სასწავლო ცენტრი წარმატებით საქმიანობს 2018 წლიდან, ის ხელს უწყობს საქართველოში ტექნიკური განათლებისა და პროფესიული მომზადების სისტემის გაუმჯობესებას. ცენტრი ფუნქციონირებს გერმანიის სამთავრობო ორგანიზაცია DEG- ის (გერმანიის ინვესტიციებისა და განვითარების საზოგადოება) პატრონაჟით.