კლინიკებს ელექტროენერგიის ტარიფი არ დაუსუბსიდირდებათ
კლინიკებს ელექტროენერგიის ტარიფი არ დაუსუბსიდირდებათ.
ჯანდაცვის მინისტრის, ეკატერინე ტიკარაძის განცხადებით, სუბსიდირება მხოლოდ საყოველთაო ჯანდაცვის ფარგლებში არსებული კლინიკების მომსახურების ტარიფებს შეეხება.
“ტარიფების დადგენასთან დაკავშირებით კლინიკები წარმატებულად მუშაობენ. მათ აქვთ ყოველდღიური შეხვედრები. სუბსიდია გათვალისწინებული იქნება მხოლოდ ტარიფში და ელექტროენერგიისა და კომუნალური ხარჯების სუბსიდირება არ განხორციელდება”,- აღნიშნა ტიკარაძემ.
ელექტროენერგიის კომერციული ტარიფის გაზრდის ფონზე, კლინიკები, გაზრდილი ტარიფის სუბსიდირებას ითხოვდნენ. ამვდროულად, მათი მოთხოვნა იყო საყოველთაო ჯანდაცვის პროგრამის ფარგლებში არსებული ტარიფების გადახედვა და ინდექსაცია.
შეგახსენებთ,რომ სამედიცინო დაწესებულებებისთვის ელექტროენერგიის ხარჯის სუბსიდირებასთან დაკავშირებით რისკებს ხედავს ენერგოომბუდსმენიც.
„კლინიკების უდიდესი უმრავლესობა კერძო სამართლის იურიდიულ პირია. შესაბამისად, ასეთი ტიპის გადაწყვეტილების მიღება სერიოზული რამ არის თავად ბიუჯეტისთვისაც. აქ საფინანსო-საბიუჯეტო მიმართულებით ძალიან ბევრი რისკია გასათვლელი“,- აღნიშნა ამ საკითხთან დაკავშირებით სალომე ვარდიაშვილმა.
