კავკასიის ავტოიმპორტი: ბაზარზე ავტომობილების გადაჭარბებული რაოდენობა გვაქვს
"კავკასიის ავტოიმპორტში" აცხადებენ, რომ ამ ეტაპზე ქართულ ბაზარზე გადაჭარბებული ავტომობილების რაოდენობა ფიქსირდება.
როგორც კომპანიის მარკეტინგის მენეჯერმა კახა ლომიძემ აღნიშნა, 2023 წლის იანვარში გასული წლის ანალოგიურ პერიოდთან შედარებით ავტომობილების ექსპორტი გაორმაგებულია.
„ბაზარზე გადაჭარბებული ავტომობილების რაოდენობა გვაქვს, რადგან ფორსმაჟორების შემდეგ, დილერებმა ძალიან ბევრი ავტომობილი შეიძინეს გასაყიდად, მაგრამ ვფიქრობ, ეს ვითარება თანდათან ჩვეულ რეჟიმს დაუბრუნდება.
თამამად უნდა ვთქვათ, რომ ზოგადად ავტომობილების ბაზარზე, კარგი პროგნოზების გაკეთება შეიძლება. ასევე კარგია ისიც, რომ ჩვენი ქვეყნის, როგორც მიმღების, გამანაწილებელისა და ავტომობილების აღდგენის საწარმოო ფუნქციის მქონე ქვეყნის შესახებ ცნობადობა გაიზარდა. სომხეთი, აზერბაიჯანი და ყაზახეთი - ესაა იმ ქვენების სამეული, რომლებიც აქტიურად იღებენ საქართველოდან ავტომობილებს.“-აღნიშნა კახა ლომიძემ.
მისივე თქმით, ავტომობილების იმპორტთან დაკავშირებული ლოგისტიკური პრობლემები ბოლო პერიოდში მოგვარდა. ფასები კი უბრუნდება ჩვეულ ნიშნულს.
„არ ხდება ავტომობილების ფასების ერთიანი ცვლილება. ძველ ნიშნულთან მიახლოებული ძალიან მალე იქნება, მაგრამ ვერ ვიტყვი, რომ ავტომობილების ღირებულება ბოლომდე იმ ნიშნულს დაუბრუნდება, რომელიც პანდემიამდე ან ომამდე იყო.“-აღნიშნა კახა ლომიძემ.
