JCB-ის ექსკლუზიური წარმომადგენლობა აზერბაიჯანში და მულტიფუნქციური სერვისცენტრი - "თეგეტა" რეგიონულ გაფართოებას განაგრძობს 

• JCB-ის სტანდარტებით შექმნილი მომსახურების ცენტრი სერვისსა და შოურუმს აერთიანებს. რეგიონის ქვეყნებში ბრიტანული ბრენდის ერთადერთი ოფიციალური წარმომადგენელი Tegeta Construcion Equipment-ია
• 1800 კვადრატული მეტრის ფართობის ცენტრში კომერციულ და სპეციალური დანიშნულების ტექნიკას „თეგეტას“ მაღალკვალიფიციური პერსონალი ემსახურება 
• პროექტის ჯამური ინვესტიცია მილიონ დოლარზე მეტია

აზერბაიჯანის დედაქალაქში „თეგეტა“ წარმომადგენლობას ახალი მულტიფუნქციური ცენტრით აფართოებს. ამიერკავკასიის რეგიონში ავტოინდუსტრიის ლიდერი კომპანიის სერვისცენტრი, რომელიც JCB-ის სტანდარტებით აშენდა, სპეციალური დანიშნულების ტექნიკასა და სატვირთო ავტომობილებს მოემსახურება. 

ბრიტანულ ბრენდს, რომელიც 800-მდე დილერით მსოფლიოს ოთხ კონტინენტზე საქმიანობს, კავკასიის მასშტაბით „თეგეტა ჰოლდინგის“ შვილობილი კომპანია Tegeta Construction Equipment ექსკლუზიურად წარმოადგენს. კომპანია აზერბაიჯანულ ბაზარს  JCB-ის სამშენებლო და სპეციალური დანიშნულების ტექნიკით მოამარაგებს და ამასთანავე, მომხმარებელს გაყიდვების შემდგომ სრულ მომსახურებასაც გაუწევს. 

ახალი მასშტაბური ცენტრი ბაქოში Tegeta Construcion Equipment-ის დირექტორმა ბაქოს წარმომადგენლობის ხელმძღვანელთან ერთად გახსნა. 

„მოხარულები ვართ, რომ სტუმრებს ჩვენს ახალ ცენტრში ვმასპინძლობთ. რამდენიმეთვიანი სამშენებლო სამუშაოები წარმატებით დავასრულეთ და შესაძლებლობა გვაქვს, ჩვენს მომხმარებელს JCB-ის უმაღლესი კლასის სამშენებლო და სპეციალურ ტექნიკასთან ერთად, გაყიდვების შემდგომი სრული მომსახურებაც შევთავაზოთ. „თეგეტას“ წლებია მჭიდრო ბიზნესკავშირები აქვს აზერბაიჯანთან, 2016-ში გავხსენით პირველი წარმომადგენლობა, მიმდინარე წლის მაისიდან კი JCB-ის სპეციალური დანიშნულების ტექნიკას მომხმარებელს ექსკლუზიურად ვთავაზობთ. ახლა უკვე გვაქვს ბრიტანული ბრენდის სტანდარტების შესაბამისი სერვისცენტრი და შოურუმი. ეს გაფართოება საშუალებას გვაძლევს, ერთი მხრივ, განვავითაროთ ბიზნესი, მეორე მხრივ, პრემიუმ ბრენდის ტექნიკის მიწოდებით ხელი შევუწყოთ ადგილობრივი ინფრასტრუქტურული პროექტების განხორციელებას“,- აცხადებს Tegeta Construcion Equipment-ის დირექტორი გიორგი ბერიძე. 

მომსახურების ცენტრი თანამედროვე ინფრასტრუქტურით 1800 კვადრატულ მეტრ ფართობს მოიცავს. სამშენებლო სამუშაოები ბაქოში ექვსი თვის განმავლობაში მიმდინარეობდა. JCB-ის წარმომადგენლობა, რომელიც აზერბაიჯანის დედაქალაქში განთავსდა, საოფისე სივრცეს, სერვისცენტრსა და შოურუმს აერთიანებს. 

გახსნის ოფიციალურ ცერემონიას ესწრებოდნენ „თეგეტას“ ბიზნესპარტნიორები, კორპორაციული მომხმარებლები, ადგილობრივი ხელისუფლების წევრები, აზერბაიჯანში საქართველოსა და ბრიტანეთის საელჩოსა და JCB-ის სათავო ოფისის წარმომადგენლები. მოეწყო საინფორმაციო ტური, პრეზენტაცია სერვისებისა და პროდუქციის შესახებ. ასევე ცენტრის გარე სივრცეში სტუმრებისათვის JCB-ის ტექნიკა იყო წარმოდგენილი. 

„დღეს ჩვენს სტუმრებს, პარტნიორებსა და კორპორაციულ მომხმარებლებს ახალი ცენტრი დეტალურად გავაცანით. აზერბაიჯანში მსხვილი ინფრასტრუქტურული პროექტები აქტიურ რეჟიმში მიმდინარეობს და შესაბამისად, იზრდება მოთხოვნა ტექნიკაზე. სამშენებლო სამუშაოების შეუფერხებლად განხორციელებისათვის, სერვისცენტრის გარდა, მომხმარებელს მობილური ჯგუფების დახმარებით ადგილზე მომსახურებასაც გავუწევთ. ეს კი ბიზნესის უწყვეტობასა და საოპერაციო პროცესების ეფექტიანად წარმართვას ნიშნავს. ბაზრის მოთხოვნების შესაბამისად, ვმუშაობთ ქსელის გაფართოებაზე და მობილური ჯგუფების რაოდენობის ზრდაზე“,- აცხადებს „თეგეტა მოტორს ბაქოს“ დირექტორი დავით ენდელაძე. 

თანამედროვე დანადგარებით აღიჭურვა უშუალოდ მომსახურების ცენტრი. მულტიბრენდულ შოურუმში კი საავტომობილო პროდუქტების ფართო არჩევანია წარმოდგენილი. 30-ზე მეტი დასახელების ბრენდი საბურავებს, აკუმულატორებს, სათადარიგო ნაწილებსა და საცხებ-საპოხ მასალებს მოიცავს. 

„თეგეტას“ მომსახურების ცენტრი და JCB-ის წარმომადგენლობა ბაქოში ქალაქის ინდუსტრიულ რაიონში განთავსდა. სამშენებლო ტექნიკის მწარმოებელი JCB 75 წელია მსოფლიო ბაზარზე ოპერირებს და 150-ზე მეტ ქვეყანაში საქმიანობს.

„თეგეტა ჰოლდინგის“ შვილობილი კომპანია Tegeta Construction Equipment ბაზარზე 2007 წლიდან ოპერირებს. ის ბრიტანული უმსხვილესი სამშენებლო ტექნიკის ბრენდის, JCB-ის ოფიციალური დილერია საქართველოში, სომხეთსა და აზერბაიჯანში. კომპანია მომხმარებელს სთავაზობს სამშენებლო და საგზაო ტექნიკას სრული საგარანტიო მომსახურებით, ასევე ნებისმიერი სამშენებლო ტექნიკის სერვისსა და სათადარიგო ნაწილებს.