იზი ჩარტერი: ტვირთების დიდი ნაწილი სახმელეთო და საზღვაო ტრანსპორტს ნელი ტემპით დაუბრუნდება
„იზი ჩარტერი“ საავიაციო სატვირთო გადაზიდვებზე მაღალი მოთხოვნის შენარჩუნებას მომავალი რამდენიმე წლის განმავლობაში ელის.
როგორც კომპანიის გენერალურმა დირექტორმა „ბიზნესპარტნიორს“ განუცხადა, მაშინ როცა სამგზავრო თვითმფრინავები 80-90%-ით გაჩერებული იყო, სატვირთო თვითმფრინავები 100%-იანი დატვირთვით მუშაობდნენ.
„მეტსაც გეტყვით, ბევრმა სამგზავრო თვითმფრინავმა სავარძლები მოხსნა და სატვირთოდ გადააკეთა. პანდემიის საწყის პერიოდში ტვირთები ძალიან სპეციფიკური იყო, მეტი წილი ნიღბებსა და სამედიცინო საშუალებებზე მოდიოდა. იმედია, პანდემია მალე დასრულდება, მაგრამ, ვფიქრობთ, ეს ტენდენცია პანდემიის შემდეგაც შენარჩუნდება. ვფიქრობ, ტვირთების დიდი ნაწილი სახმელეთო და საზღვაო ტრანსპორტს ძალიან ნელი ტემპით დაუბრუნდება,“-განაცხადა რატი ძერიამ.
მისივე ინფორმაციით, „იზი ჩარტერმა“ სამ თვეში 118 სატვირთო ავიარეისი შეასრულა.
„ტვირთები სხვადასხვა ქვეყანაში გადაგვაქვს. ჩვენი ძირითადი მიმართულებებია: აზია, ახლო აღმოსავლეთისა და აფრიკის ქვეყნები. მათ შორის, ავღანეთი ერაყი, ქუვეითი, რამდენიმე ჰუმანიტარულ რეისს მალიში და კონგოშიც ახლო მომავალში შევასრულებთ. მინდა ვთქვა, რომ იმდენად ამოუწურავი ბაზარია, კიდევ რამდენიმე თვითმფრინავი რომ გვყავდეს მოთხოვნას მაინც ვერ დავაკმაყოფილებთ,“ - განაცხადა რატი ძერიამ.
