"გლენბერი” 300 ჰექტარ ტერიტორიაზე სათბურს მოაწყობს

გაყინული ხილ-ბოსტნეულის გადამამუშავებელი და შემნახველი საწარმო „გლენბერი” 2 წელში 300  ჰექატარ ტერიტორიაზე სათბურის მოწყობას და 200 მლნ ლარის ინვესტიციის განხორციელებას გეგმავს.

როგორც კომპანიის ხელმძღვანელი  რაფაელ მაღალაშვილი „ბიზნესპარტნიორთან“  აცხადებს, პრობლემაა ნატურალური და კარგი ხარისხის პროდუქციის შესყიდვა, ამის გამო კომპანია იძულებულია პროდუქციის ნაწილი  მეზობელი ქვეყნებიდან შემოიტანოს.

„პრობლემაა  და თითქმის ძალიან მიზერული რაოდენობით იწარმოება მწვანე, ყვითელი და სტაფილოსფერი ბულგარული  წიწაკა. ამის გამო იძულებული გავხდი მომავალი წლისთვის მოყვანა დავიწყო. ასევე არ არის ბროკოლი და ყვავილოვანი კომბოსტოც, რომელსაც ასევე მოვიყვან სათბურში,“ - აცხადებს მაღალაშვილი.

მისივე განცხადებით, კომპანიას ამ დროისთვის  ბროკოლის და ყვავილოვანი კომბოსტოს სათბურები 5 ჰექტარზე აქვს გაშენებული, 11 ჰექტარზე მარწყვის სათბურია, დამატებით მიმდინარეობს 7 ჰექტარზე სათბურის მოწყობის სამუშაოებიც.

ბიზნესმენი დაინტერესებულია მარნეულში მიწის  შესყიდვით ან იჯარით, სადაც 25 ჰექტარზე მარწყვის სათბურს მოაწყობს.

მისი განმარტებით, „გლენბერს” შეკვეთები აშშ-დან და ისრაელიდან აქვს.  დამკვეთები საქართველოდან ელოდებიან როგორც ბოსტნეულის, ისე გაყინული მარწყვის, ჟოლოსა და მაყვლის მიწოდებას.

„გლენბერი” 2018 წელს გაიხსნა. კომპანიამ საწყის ეტაპზე 9 მლნ ლარის ინვესტიცია განახორციელა. კომპანია შიდა ქართლში, ქარელში მდებარეობს, საწარმოში 250 კაცია დასაქმებული.