"გირჩევნია" ბაზარზე ფიჭვის ყვავილის ჩაის და გირჩის სიროფს გამოიტანს

ადგილობრივი, ნატურალური ქართული პროდუქტების მწარმოებელი კომპანია "გირჩევნია" ნოემბერში მომხმარებლისთვის ფიჭვის ყვავილის ჩაის და გირჩის სიროფის წარდგენას გეგმავს.

ჯანმრთელობისთვის სასარგებლო სხვა პროდუქტებს კომპანია 2013 წლიდან აწარმოებს. გირჩის მურაბა, თაფლი, ფიჭვის კევი და ფიჭვის ყვავილის მტვერი იყიდება როგორც ქსელურ, ისე სპეციალიზირებულ აგრო-მარკეტებშიც.

ნედლეული ბორჯომსა და რაჭაში გაზაფხულზე, ან ზაფხულის პირველ დღეებში გროვდება. სეზონურად 12-15, წარმოების პროცესში კი 4-5 ადამიანია ჩართული.

„გემოვნურ თვისებებთან ერთად, „გირჩევნიას“ პროდუქტები უნიკალური სამკურნალო-საპროფილაქტიკო მახასიათებლებითაც გამოირჩევა. მსგავსი ნაწარმის შეძენა, აქამდე, როგორც წესი, სურამში, აბასთუმანში ან ბორჯომში იყო შესაძლებელი. ჩვენ კი ეს დისტანცია შევამცირეთ. მომხმარებელთან მუდმივი უკუკავშირი გვაქვს. მაგალითად, ბოლოდროინდელმა გამოკითხვებმა გვაჩვენა, რომ გირჩის მურაბას მშობლები ცოტაოდენი ძალდატანებით აძლევდნენ ბავშვებს, ამიტომ, მოვიფიქრეთ გირჩის სიროფის მზა სახით წარმოება. ფიჭვის ყვავილის ჩაიც მეორე ახალი პროდუქტია, რომელსაც დახლებზე ნოემბერში განვათავსებთ,“ - აცხადებს "გირჩევნიას“ დამფუძნებელი გოგა ციცქიშვილი.

კომპანია 2013 წელს დაარსდა. დასაწყისში საქმიანობას საოჯახო წარმოების სახე ჰქონდა, თუმცა, მალევე, ცნობადობის გაზრდასთან და მომხმარებელთა რაოდენობის მატებასთან ერთად, ბრენდი ოფიციალურ, სტანდარტულ საწარმოდ ჩამოყალიბდა.

კომპანია „აწარმოე საქართველოს“ საგრანტო კონკურსში მონაწილეობს და გამარჯვების დიდი იმედი აქვს. სამომავლო გეგმებში საწარმოს ტექნიკურად განვითარება და ექსპორტის განხორციელება შედის.