Gepherrini-ს პროდუქცია კანადაშიც გაიყიდება
Gepherrini კანადის ბაზარზე შესასვლელად ემზადება. კომპანიის დამფუძნებელი ილია გეფერიძე „ბიზნესპარტნიორთან“ აცხადებს, რომ ხელშეკრულება უკვე გაფორმებულია, პირველი პარტია კი წლის დასაწყისში გაიგზავნება.
მისი ინფორმაციით,Gepherrini 2022 წელს ექსპორტის მიმართულებით საკმაოდ გააქტურდა. მათ შორის, ჩინეთთან გაფორმდა 4 წლიანი ხელშეკრულება, რომელიც ონლაინ პლატფორმა Tmall-ზე გაყიდვებს გულისხმობს.
ტყავის აქსესუარების კომპანიამ 2022 წელი 23%-იანი ზრდით დაასრულა. მიუხედავად ამისა, რუსეთ-უკრაინის ომმა და პანდემიამ კომპანიას არ მისცა იმის საშუალება დაგეგმილი საინვესტიციო პროექტი სრულად განეხორციელებინა.
საუბარია, ქალისა ტანსაცმლის ხაზის ამოქმედებაზე. „გაყიდვები იყო, რაც იმას ნიშნავს, რომ მომხმარებელი მოგვყვება. ეს გრძელვადიანი პროექტია და დრო უნდა. მოკლევადიან პერიოდში დიდ შედეგს არ ველოდებით,“-აცხადებს გეფერიძე.
2014 წელს დაფუძნებული Gepherrini ქალის, მამაკაცისა და ბავშვის ჩანთების გარდა სამაჯურებს, სამგზავრო ჩანთებს, ტყავის ქამრებს და საფულეებს აწარმოებს. კომპანიას ამჟამად წარმოება ნაძალადევის რაიონში, მექანიზაციის ქუჩაზე აქვს.
