Gepherrini 5 თვეში წარმოებას ახალი ქარხნიდან დაიწყებს
ჩანთების მწარმოებელი ქართული კომპანია Gepherrini 5 თვეში წარმოებას ახალი ქარხნიდან დაიწყებს.
Gepherrini-ს დამფუძნებელი ილია გეფერიძე „ბიზნესპარტნიორთან“ აცხადებს, რომ კომპანიამ ფართი ვაშლიჯვარში უკვე შეიძინა.
ტყავის აქსესუარების კომპანიამ 2022 წელი 23%-იანი ზრდით დაასრულა. მიუხედავად ამისა, რუსეთ-უკრაინის ომმა და პანდემიამ კომპანიას არ მისცა იმის საშუალება დაგეგმილი საინვესტიციო პროექტი სრულად განეხორციელებინა. ახალი პროექტების დაწყებას კი კომპანია ახალი ქარხნიდან გეგმავს.
საუბარია, ქალისა ტანსაცმლის ხაზის ამოქმედებაზე. „გაყიდვები იყო, რაც იმას ნიშნავს, რომ მომხმარებელი მოგვყვება. ეს გრძელვადიანი პროექტია და დრო უნდა. მოკლევადიან პერიოდში დიდ შედეგს არ ველოდებით,“ - აცხადებს გეფერიძე.
2014 წელს დაფუძნებული Gepherrini ქალის, მამაკაცისა და ბავშვის ჩანთების გარდა სამაჯურებს, სამგზავრო ჩანთებს, ტყავის ქამრებს და საფულეებს აწარმოებს. კომპანიას ამჟამად წარმოება ნაძალადევის რაიონში, მექანიზაციის ქუჩაზე აქვს.
